Qazaqstan Serbiiadan satyp alynǵan qarý-jaraq pen áskeri tehnikany úshinshi memleketke qaita satqysy kelse, bastapqy jetkizýshi eldiń kelisimin alýǵa mindetti, dep dalanews.kz tilshisi Ulysmedia.kz saityna silteme jasap habarlaidy.
Bul másele 16 qyrkúiekte Quryltai otyrysynda Qazaqstan men Serbiia arasyndaǵy áskeri-tehnikalyq yntymaqtastyq týraly kelisimdi ratifikatsiialaý jobasyn talqylaý kezinde kóterildi. Qujat birinshi oqylymda maquldandy.
Depýtat Aijan Aimaǵanova kelisimdegi eki talapqa nazar aýdardy. Onyń birinde qarý-jaraq pen áskeri tehnikany úshinshi elge berý úshin ekinshi taraptyń aldyn ala jazbasha kelisimi qajet ekeni kórsetilgen. Al ekinshi tarmaqta eksporttyq baqylaý ár memlekettiń ulttyq zańnamasyna sáikes júrgiziletini jazylǵan.
Osyǵan bailanysty depýtat Qazaqstan óz zańnamasy boiynsha eksportqa ruqsat alǵan jaǵdaida da bastapqy jetkizýshiden qaitadan kelisim alý qajet pe degen suraq qoidy.
Qorǵanys ministriniń orynbasary Shaih-Hasan Jazyqbaevtyń túsindirýinshe, mundai jaǵdaida bastapqy óndirýshi nemese jetkizýshi taraptyń kelisimi báribir qajet.
Iaǵni Qazaqstanda eksportqa ruqsat bolǵannyń ózinde, Serbiiadan alynǵan qarý-jaraq pen áskeri tehnikany úshinshi memleketke berý nemese qaita satý úshin serb tarapynyń jeke kelisimi talap etiledi.
Kelisim áskeri maqsattaǵy ónimderdi ózara jetkizý, qarý-jaraq pen áskeri tehnikany jóndeý jáne tehnikalyq qyzmet kórsetý, tehnologiialar transferi, birlesken zertteýler men synaqtar júrgizý siiaqty baǵyttardy qamtidy.
Qorǵanys ministrliginiń málimetinshe, Qazaqstannyń qazirgi tańda 15-ten astam memleketpen áskeri-tehnikalyq yntymaqtastyq týraly uqsas kelisimderi bar.
