Mańǵystaý oblysynda jaz bastalysymen qaraqurt shaqqan turǵyndar sany kóbeiip jatyr. Bul týraly oblystyq kópbeiindi aýrýhananyń basshysy Berik Qaýynov málimdedi, dep habarlaidy dalanews.kz Lada.kz-ke siltep.
Onyń aitýynsha, maýsym bastalǵaly beri tek oblystyq aýrýhananyń ózine qaraqurt shaqqan alty adam júgingen. Mundai jaǵdailar Jańaózen, Beineý, Shetpe jáne Jetibai eldi mekenderinde de tirkelgen.
Dárigerlerdiń sózinshe, biyl ýly órmekshiler ádettegiden erterek belsendilik tanytqan.
"Ádette qaraqurt shaqqan adamdardyń sany shilde-tamyz ailarynda kóbeiedi. Qazir maýsymnyń ortasy ǵana bolsa da, zardap shekkender sany alańdaýshylyq týǵyzady. Sondyqtan turǵyndardy saq bolýǵa shaqyramyz", - dedi Berik Qaýynov.
Mamandar dalada nemese bos jatqan aýmaqtarda jalańaiaq júrmeýge, ashyq jerde jumys istegen kezde jabyq kiim kiiýge keńes beredi. Sondai-aq, kiim men aiaqkiimdi kimes buryn muqiiat tekserip shyǵý qajet. Zattardy túnde dalada qaldyrmaǵan jón. Al úi mańyndaǵy aýmaqtardy qurǵaq shópten, qoqystan jáne tastardan tazartyp otyrý kerek.
Qaraqurt baiqalsa, ony óz betimen ustaýǵa nemese joiýǵa áreket jasamaǵan durys. Mundai jaǵdaida arnaiy qyzmetterge habarlasý qajet. Dárigerler qaraqurt ýy adam aǵzasyna asa qaýipti ekenin aitady. Onyń ýy júike júiesine áser etip, aýyr asqynýlarǵa ákep soǵýy múmkin.
Qaraqurt shaqqannan keiin alǵashqy sátte adam jeńil aýyrsyný nemese ashytý sezinýi yqtimal. Alaida 15-60 minýttan soń mynadai belgiler paida bolýy múmkin:
– búkil denege taralatyn qatty aýyrsyný;
– bulshyq ettiń túiilýi men qurysýy;
– ish, keýde jáne bel aýyrýy;
– qan qysymy kóterilýi;
– júrek soǵysy jiileýi;
– tersheńdik, álsizdik jáne mazasyzdyq;
– júrek ainý, qusý;
– tynys alý qiyndaýy.
Ásirese, balalar, qart adamdar jáne júrek-qan tamyrlary aýrýlary bar naýqastar úshin qaraqurt óte qaýipti. Mamandardyń aitýynsha, der kezinde meditsinalyq kómekke júgingen adamdardyń basym bóligi tolyq saýyǵyp ketedi.
