Óńirde 2025–2026 jyldardaǵy jylytý maýsymyna daiyndyq aiasynda turǵyn úi sektorynda profilaktikalyq jumystyń birinshi kezeńi bastaldy. Erekshe nazar áleýmettik turǵydan osal toptaǵy azamattardyń úilerine aýdarylýda. Sebebi jyl saiyn órt oqiǵalarynyń basym bóligi jeke turǵyn úilerde tirkeledi,- dep habarlaidy Dalanews.kz
Abai oblysy TJD bastyǵynyń orynbasary Aleksei Shtykeldiń málimetinshe, 15 tamyz ben 15 qyrkúiek aralyǵynda kópbalaly jáne az qamtylǵan otbasylardyń, zeinetkerler men múmkindigi shekteýli jandardyń úilerine baryp, tekserý júrgizilip jatyr. Mundai aldyn alý sharalary órt qaýipsizdigi erejelerin buzýshylyqtardy anyqtaýǵa jáne túsindirý jumystaryna múmkindik beredi.
– Statistikaǵa sáikes, eń qaýipti aimaq – turǵyn úi sektory. Órtterdiń shamamen 70 paiyzy jáne adam ólimi jaǵdailarynyń 90 paiyzy osy sektorǵa tiesili. 2024–2025 jylǵy jylytý maýsymynda oblysta 304 órt tirkeldi, bul aldyńǵy kezeńmen (211 jaǵdai) salystyrǵanda 44 paiyzǵa kóp. Órt saldarynan 12 adam zardap shegip, 9 adam qaza tapty, olardyń ishinde eki bala bar. Qaiǵyly oqiǵalardyń basty sebepteri – balalardy qaraýsyz qaldyrý jáne mas kúiinde tósekke jatyp shylym shegý, – dep atap ótti spiker.
Órtten bólek, jalyn shyqpai-aq kómirqyshqyl gazynan ýlaný derekteri de tirkelgen. Ótken maýsymda 11 adam qaza tapty, bul ótken jylmen salystyrǵanda 2,7 ese kóp. Degenmen áleýmettik turǵydan osal toptaǵy otbasylardyń úilerine ornatylǵan kómirqyshqyl gazynyń datchikteri tiimdiligin dáleldedi. Semei men Jarma aýdanynda der kezinde iske qosylǵan qurylǵylardyń arqasynda tórt adamnyń, sonyń ishinde bir balanyń ómiri saqtalyp qaldy.
Óńirde halyqtyń áleýmettik turǵydan osal toptaryna datchik ornatý baǵdarlamasy jalǵasýda. 2025 jyly mundai otbasylardyń sany 30 paiyzǵa artyp, 6 733-ke jetti. Búgingi kúni olardyń barlyǵy tolyqtai datchiktermen qamtamasyz etilgen.
– Turǵyn úi sektoryndaǵy jaǵdai erekshe nazardy qajet etedi. Órt pen adam ólimi derekteriniń ósýin kórip otyrmyz, sondyqtan táýekel tobyndaǵy otbasylarmen maqsatty profilaktikalyq jumystar júrgizýdemiz. Eń bastysy, kómirqyshqyl gazynyń datchikteri shyn máninde adam ómirin saqtap qalatynyn sońǵy jyldardaǵy tájiribe aiqyn kórsetti, – dep túiindedi Aleksei Shtykel.
