Túrkistan qalasynda jyl basynan beri 872 páter paıdalanýǵa berilgen. Onyń 440-y - arendalyq baspanalar bolsa, 432-si - kezekte turǵan otbasylarǵa tabystalǵan. Bul jaıynda Túrkistan qalalyq Turǵyn úı qatynastary jáne turǵyn úı ınspeksıasy bóliminiń basshysy Talǵat Úsenbaev BAQ ókilderimen ótken brıfıńte málimdedi,- dep habarlaıdy Dalanews.kz

«Búgingi tańda Túrkistan qalasy boıynsha 23 370 azamat turǵyn úı kezeginde tur. Bıyl turǵyn úımen qamtamasyz etý maqsatynda 944 páterli 11 turǵyn úıdi paıdalanýǵa berý josparlanǵan. Jyl sońyna deıin qalǵan 512 páterli 6 turǵyn úıdiń qurylys jumystary tolyqtaı aıaqtalady»,- dedi spıker.

Sonymen qatar, brıfıńke qatysqan Túrkistan oblystyq «Otbasy bank» AQ fılıaly dırektorynyń orynbasary Dáýren Myrzataev bıyl shaharda «Otbasy bank» arqyly nesıelik júıemen 2 078 turǵyn úıdi beriletinin aıtty.

Túrkistan qalasynda ornalasqan turǵyn úılerge ótinishter - Túrkistan oblysy boıynsha úı kezekte turǵan bank salymshylarynan qabyldanady. Al, sharshy metr baǵasy 180 000 men 220 000 teńge aralyǵynda bolmaq.