Qazaqstanda sońǵy úsh jylda jol-kólik oqiǵalary 127,5%-ǵa artsa da, apattan kóz jumǵandar sany 8,4%-ǵa azaidy, dep habarlaidy Dala News.
Densaýlyq saqtaý ministrliginiń málimetinshe, osy kezeńde tirkelgen jol apattarynyń sany 15,8 myńnan 36,1 myńǵa deiin ósken. Zardap shekkender sany da 19,5 myńnan 49,2 myń adamǵa jetip, 2,5 esege artqan.
Soǵan qaramastan, jol-kólik oqiǵalarynan qaza tapqandar sany 2543-ten 2330 adamǵa deiin tómendegen.
Densaýlyq saqtaý ministrliginiń shtattan tys bas travmatology, akademik N.D. Batpenov atyndaǵy Ulttyq travmatologiia jáne ortopediia ǵylymi ortalyǵynyń basshysy Oljas Bekárisovtiń aitýynsha, joldaǵy qaýipsizdik mádenietiniń tómendigi men profilaktikalyq jumystyń jetkiliksizdigi jol apattarynyń kóbeiýine áser etip otyr.
Vedomstvo deregine sáikes, sońǵy on jylda jaraqattardan, ýlanýdan jáne jazataiym oqiǵalardan bolatyn ólim kórsetkishi eki esege jýyq tómendegen.
Mamandar apattan keiingi alǵashqy saǵattarda bolatyn ólim-jitimdi azaitý úshin jedel járdemniń jetý ýaqytyn qysqartý, meditsinalyq uiymdardyń daiyndyǵyn kúsheitý jáne trassalardaǵy shuǵyl kómek infraqurylymyn damytý qajet ekenin atap ótti.
Osy maqsatta 2026-2030 jyldarǵa arnalǵan jol-kólik jaraqattarynyń saldaryn azaitý jónindegi vedomstvoaralyq jospar iske asyrylyp jatyr.
