Qaraǵandyda memleket basshysy Qasym-Jomart Toqaevtyń «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Joldaýyn talqylaýǵa arnalǵan oblystyq jiyn otyrysy ótti.
Jiynǵa memlekettik organdardyń basshylary, depýtattar, ardagerler, qurmetti azamattar jáne qoǵam qairatkerleri qatysty. Qalalar men aýdandar onlain rejiminde qosyldy. Keńestiń negizgi maqsaty – Joldaýda aiqyndalǵan mindetterdi Qaraǵandy oblysynda júzege asyrý joldaryn talqylaý. Prezident joldaýynda el damýynyń strategiialyq baǵyttary naqtylandy.
Atap aitqanda, tsifrlandyrý men jasandy intellektini engizý, áleýmettik turaqtylyqty nyǵaitý máseleleri kóterildi. Jiyn barysynda sóz alǵan oblys ákimi Ermaǵanbet Bólekpaev Prezidenttiń «búgingi dáýirdegi bizdiń basty bailyǵymyz – munai emes, bilim men intellekt» degen sózin negizge ala otyryp, Qaraǵandynyń ejelden bilikti kadrlarymen, myqty bilim berý áleýetimen tanylǵanyn tilge tiek etti.
– Ǵylymǵa, ónerkásipke, meditsinaǵa ólsheýsiz úles qosqan mamandardy daiarlaǵan óńir búgin, zaman talabyna sai, algoritmmen, jasandy intellektpen jumys isteitin kadrlar tárbieleýi kerek. Qaraǵandy óńiri bolashaq Qazaqstannyń zerthanasyna ainalýy tiis – munda dástúrli óndiris pen jańa tehnologiia, aýyr ónerkásip pen jasandy intellekt toǵysýy qajet. Sonda ǵana bizdiń belsendiligimiz ben bastamashyldyǵymyz tek óńirdiń ǵana emes, tutas eldiń damý qarqynyna áser etedi, – dep atap ótti Ermaǵanbet Bólekpaev.
Basqosý barysynda oblys ákiminiń birinshi orynbasary Azamat Taijanov turǵyn úi-kommýnaldyq jáne kólik infraqurylymyn keshendi jańǵyrtý máseleleri boiynsha sóz sóiledi.
Ol zamanaýi tehnologiialar men tsifrlyq sheshimderdi engizý atalǵan sala jumysyn jandandyrýǵa múmkindik beretinin alǵa tartty. Al investitsiia, týrizm, kásipkerlik jáne óńdeý ónerkásibine qatysty óńirde atqarylyp jatqan jumys barysyn oblysy ákiminiń áleýmettik-ekonomikalyq damý baǵytyna jaýapty orynbasary Ermek Alpysov baiandady. Onyń aitýynsha, qazirgi tańda oblysta 120 investitsiialyq joba qolǵa alyndy. Sonyń arqasynda 20 myńnan astam jańa jumys orny ashylady.
Jiynǵa qatysqan sarapshylardyń aitynsha, bul aimaq damýyna jańa serpin beredi. Agroónerkásiptik keshendi damytý joldary jóninde oblys ákiminiń orynbasary Rýslan Kenjebekov baiandady. Atap aitqanda, agrohabt qurý, veterinariialyq qyzmetti jetildirý, óńirdiń tsifrlyq kartasyn engizý jáne sý resýrstaryn saqtaý sharalary talqylandy. Aqparattandyrý, memlekettik qyzmetter kórsetý jáne arhivter basqarmasynyń basshysy Konstantin Ilnitskii «Digital Qazaqstan» ulttyq strategiiasy aiasynda atqarylyp jatqan jumyspen tanystyrdy.
Sondai-aq, aldaǵy 5 jylda «Qarmet» AQ-na tiesili óndiristi jańǵyrtý, jańa tehnologiialardy engizý jáne kompaniianyń investitsiialyq jobalaryn iske asyrýǵa bailanysty josparymen bólisti. Kásiporynnyń turaqty damý jónindegi basqarýshy direktory – Erbol Ismailovtyń aitýynsha, bul maqsatqa 1,6 trln teńge bólinedi.
Qorshaǵan ortany qorǵaý, sýdy únemdeý, ekologiialyq mádenietti qalyptastyrý máselelerin sheshý joldaryn oblystyq Qoǵamdyq keńestiń tóraǵasy Serikjan Baibosynov usyndy. Baiandamashy «Taza Qazaqstan» respýblikalyq jobasynyń mańyzdylyǵyna airyqsha toqtap ótti. Otyrys sońynda oblys ákimi Ermaǵanbet Bólekpaev turaqty damý taqyrybyna toqtaldy.
–Turaqty damý – bul tek ekonomika men ekologiia ǵana emes, sonymen birge myzǵymas quqyqtyq negiz. Myqty memlekettiń irgetasy – ádiletke negizdelgen zań, parasatty bilik jáne jaýapkershiligi joǵary azamattar. Osynyń báriniń túpqazyǵy – Zań jáne tártip. Olai bolsa, Prezident belgilegen strategiialyq baǵyttar boiynsha jumysymyzdy júielep, naqty qadamdarǵa kósheiik, – dep oiyn túiindedi oblys ákimi.
Aiaýlym SOVET
