Qazaqstanda jańa vedomstvo – Jasandy intellekt jáne tsifrlyq damý ministrligi qurylmaq, dep habarlaidy Dalanews.kz.
Qaita uiymdastyrý qalai júrgiziledi?
Jasandy intellekt jáne tsifrlyq damý ministrligi qazirgi Tsifrlyq damý, innovatsiialar jáne aeroǵarysh ónerkásibi ministrliginiń (TsDIAÓM) negizinde qurylady. Bul týraly Úkimet otyrysynda ministr Jaslan Mádiev aitty. Onyń sózinshe, TsDIAÓM-niń birqatar fýnktsiialary qaita bólinedi.
"Memleket basshysynyń tapsyrmasyn oryndaý úshin TsDIAÓM bazasynda Qazaqstan Respýblikasynyń Jasandy intellekt jáne tsifrlyq damý ministrligi qurylady. Al innovatsiialyq saiasatqa qatysty fýnktsiialar Ǵylym jáne joǵary bilim ministrligine beriledi", – dedi ol.
Mádievtiń aitýynsha, tiisti jarlyqtyń jobasy daiyndalyp, memlekettik organdarǵa kelisýge joldanǵan.
Qai fýnktsiialar Ǵylym jáne joǵary bilim ministrligine ótedi?
Ministr Saiasat Nurbektiń málimetinshe, onyń vedomstvosyna mynadai fýnktsiialar beriledi:
innovatsiialyq granttar bólý;
ónerkásiptik innovatsiialyq jobalardy qarjylandyrý;
investitsiialyq qorlar qurý;
arnaiy ekonomikalyq aimaqtardy damytý;
akseleratsiia jáne biznes-inkýbatsiiany júrgizý;
bilim berý jáne ǵylymi-tehnologiialyq baǵdarlamalardy engizý.
"Bul mindetter tiisti fýnktsiialar men vedomstvolyq uiymdardy Ǵylym jáne joǵary bilim ministrligine berý arqyly iske asyrylady", – dep túsindirdi ol.
Sonymen qatar Mádiev parlamentte Tsifrlyq kodeks boiynsha jumys bastalǵanyn aitty.
"Tsifrlyq kodeks parlamenttiń qaraýyna engizildi. Ony jetildirý úshin arnaiy quzyretter ortalyǵy quryldy. Joba Memleket basshysy belgilegen merzimde qabyldanady", – dedi ministr.
Qyrkúiektegi Joldaýynda prezident Qasym-Jomart Toqaev qazirgi Tsifrlyq damý ministrliginiń negizinde Jasandy intellekt jáne tsifrlyq damý ministrligin qurý qajettigin aitqan bolatyn.
