Ázerbaijanda Baký aviatsiialyq forýmyna reseilik kompaniialardy tirkeý toqtatyldy, dep habarlaidy Dalanews.kz.
Bul týraly aqparat Halyqaralyq áýe kóligi qaýymdastyǵynyń (IATA) resmi saitynda paida bolǵan.
"Álemdik aviatsiialyq janarmai qaýymdastyǵynyń basty salalyq kezdesýi retinde AEF tek IATA músheleri men IATA strategiialyq seriktesteriniń shaqyrýymen ótkiziledi. Azerbaijan Airlines kompaniiasynyń Embraer E190 ushaǵynyń apatyn tergeý nátijeleri jariialanǵanǵa deiin, qabyldaýshy eldiń talaby boiynsha Resei Federatsiiasynyń kompaniialaryn tirkeý ýaqytsha toqtatyldy", delingen saitta.
Aviatsiialyq energetika forýmy (Aviation Energy Forum, AEF) 13-15 mamyrda Ázerbaijannyń Baký qalasynda ótedi dep josparlanǵan.
Bul is-shara janarmai forýmy men Turaqty aviatsiialyq janarmai (SAF) simpoziýmyn biriktiredi. Forým aviakompaniia ókilderi, janarmai men SAF jetkizýshileri jáne IATA-nyń strategiialyq seriktesteri úshin uiymdastyrylǵan.
Aita keteiik, 2024 jyly 25 jeltoqsanda jergilikti ýaqyt boiynsha 11.30-da Aqtaý mańynda Bakýden Groznyiǵa ushyp bara jatqan ushaq apatqa ushyrady. Bul - Azerbaijan Airlines áýekompaniiasyna tiesili Embraer 190 ushaǵy.
Aqparat boiynsha ushaq bortynda 67 adam, onyń ishinde 5 ekipaj múshesi bolǵan.
Apattan 6 qazaqstandyq kóz jumdy. Jalpy qaza tapqandar sany — 38. Qaiǵyly oqiǵadan 29 adam aman qaldy.
Qaiǵyly oqiǵadan keiin Ázerbaijanda Jalpyulttyq aza tutý kúni jariialandy. Túste búkil el boiynsha memlekettik týlar túsirilip, kólikter toqtady. Ázerbaijandyqtar qaza tapqandardy bir minýt únsizdikpen eske aldy.
Keiinirek Chikago konventsiiasynyń 13-qosymshasyna sáikes Qazaqstan Ázerbaijan men Reseidiń aviatsiialyq organdarymen aqyldasqan soń, QR Kólik ministri Marat Qarabaev basqaratyn komissiia Embraer ushaǵynyń qara jáshigin Braziliiadaǵy CENIPA ortalyǵyna jiberý týraly sheshim qabyldady.
