Aqtaýdaǵy ushaq apatynan qaza tapqan qyzdyń qabirin belgisiz bireýler birneshe ret tonaǵan

Aqtaýdaǵy ushaq apatynan qaza tapqan qyzdyń qabirin belgisiz bireýler birneshe ret tonaǵan
Videodan kadr: 31 arna

Qostanaida Aqtaý mańyndaǵy AZAL ushaǵynyń apatynan kóz jumǵan Salimat Jutaevanyń qabiri birneshe ret urylardyń nysanasyna ainalǵan. Marqumnyń týystary ornatqan beinebaqylaý kamerasyn da belgisiz bireýler urlap ketken, dep dalanews.kz tilshisi 31 arnaǵa silteme jasap habarlaidy.

Marqumnyń anasy Ultýǵan Jutaeva zirattaǵy urlyq áreketterine bailanysty jýrnalisterge qaita júginýge májbúr bolǵan. Onyń aitýynsha, qyzynyń qabirine otyrǵyzylǵan gúlder men sándik butalar birneshe ret qoldy bolǵan.

Tipti bir joly belgisiz adamdar zirat basyndaǵy mármár oryndyqty da alyp ketpek bolǵan. Alaida týystary der kezinde baiqap, onyń urlanýyna jol bermegen. Osyndai jaǵdailar qaitalana bergen soń otbasy qabir basyna beinebaqylaý kamerasyn ornatýdy uiǵarǵan. Biraq urylar kameranyń ózin de julyp alyp ketken.

"Biz bul jerdi qorǵaý úshin beinekamera ornattyq. Urylardy toqtatady dep oiladyq. Biraq olar kamerany túbimen julyp áketken. Abyroi bolǵanda, politsiia kúdiktini tapty. Sol adamnyń kózine qarap, mundai áreketke ne úshin barǵanyn suraǵym keledi. Bul jerde eshqandai qorshaý joq, eshteńe qorǵalmaǵan", – deidi marqumnyń anasy.

Qostanai oblystyq politsiia departamentiniń málimetinshe, oqiǵaǵa qatysy bolýy múmkin adam anyqtalǵan.

"Politsiia qyzmetkerleri atalǵan derekke qatysy bolýy yqtimal tulǵany anyqtady. Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan qajetti tergeý sharalary júrgizilip jatyr", – dedi kriminaldyq politsiia basqarmasynyń aǵa jedel ýákili Airi Temirǵalieva.

Al Qostanai aýdanynyń ákimdigi zirat aýmaǵyn abattandyrýǵa ázirge qarajat bólinbegenin habarlady.

Aýdandyq turǵyn úi-kommýnaldyq sharýashylyq bóliminiń basshysy Denis Petrýhnonyń aitýynsha, aýdandyq jáne oblystyq biýdjetten qarjy bólý týraly ótinimder usynylǵanymen, olar maquldanbaǵan. Endi bul máseleni 2027 jylǵy biýdjet aiasynda qaita qarastyrý josparlanyp otyr.

Marqumnyń otbasy quzyrly organdardan zirattaǵy qaýipsizdikti qamtamasyz etýdi jáne mundai oqiǵalardyń qaitalanýyna jol bermeýdi talap etip otyr.

Eske sala keteiik, Azerbaijan Airlines (AZAL) áýe kompaniiasynyń ushaǵy 2024 jylǵy 25 jeltoqsanda Aqtaý mańynda apatqa ushyraǵan bolatyn.