Alty balasy bar áielge jalǵan úilengen: Ulttyq ulannyń burynǵy polkovnigi shartty jaza aldy

Alty balasy bar áielge jalǵan úilengen: Ulttyq ulannyń burynǵy polkovnigi shartty jaza aldy
pixabay.com

Aqtóbe garnizonynyń áskeri soty Ulttyq ulannyń burynǵy polkovnigin turǵyn úi ótemaqysyn zańsyz alý arqyly alaiaqtyq jasaǵany úshin sottady. Memleketke keltirilgen zalal 62,9 mln teńgeden asty. Alaida ol túrmege qamalmaidy, dep habarlaidy dalanews.kz.

Sot úkimine sáikes, burynǵy polkovnik Qylmystyq kodekstiń 190-baby 4-bóliginiń 2-tarmaǵy boiynsha kináli dep tanylǵan. Alǵashynda oǵan 5 jyl 6 ai bas bostandyǵynan aiyrý jazasy taǵaiyndalǵan. Raqymshylyqqa bailanysty jaza merzimi besten bir bólikke qysqartylyp, túpkilikti 4 jyl 4 ai 24 kún bolyp belgilengen. Alaida Qylmystyq kodekstiń 63-baby negizinde bul jaza shartty dep tanyldy.

Sonymen qatar sot ony «polkovnik» áskeri ataǵynan aiyrdy. Jazanyń barlyq merzimine probatsiialyq baqylaý belgilendi.

Sot materialdaryna sáikes, áskeri qyzmetshi otbasy músheleriniń sanyn jasandy túrde kóbeitý arqyly turǵyn úi ótemaqysyn zańsyz alǵan. Ol alty balany tárbielep otyrǵan áielge otbasyn qurý nietinsiz nekege turýdy usynyp, bul úshin 4,5 mln teńge tóleýge ýáde bergen. Sot qujattarynda áieldiń jańylystyrylyp, usynysqa keliskeni kórsetilgen.

Keiin polkovnik Ulttyq ulannyń turǵyn úi komissiiasyna qyzmettik baspanany jekeshelendirý quqyǵynyń ornyna aqshalai ótemaqy tóleý týraly ótinish bergen. Komissiia oǵan 66 mln teńgeden astam qarajat aýdarýdy maquldaǵan.

Budan soń ol aqshany qolma-qol aqshaǵa ainaldyrý úshin Qostanaidan páterdi formaldy túrde satyp alǵan. Kópbalaly anaǵa da ýáde etilgen 4,5 mln teńge berilgen.

Sotta aiyptalýshy kinásin moiyndap, bas bostandyǵynan aiyrmaýdy suraǵan. Ulttyq ulan ókili memleketke keltirilgen zalaldyń ótelgenin málimdep, azamattyq talapty qaraýsyz qaldyrýdy ótingen. Jaza túrin belgileýdi sottyń qaraýyna qaldyrǵan.

Sot otyrysy ashyq ótken. Jábirlenýshi tarap retinde Qazaqstannyń Ulttyq ulany tanylǵan.