«Qýatty aimaqtar»: Oljas Bektenov Aqtóbe oblysyndaǵy taý-ken metallýrgiia kesheniniń júie quraýshy kásiporyndaryn aralady

«Qýatty aimaqtar»: Oljas Bektenov Aqtóbe oblysyndaǵy taý-ken metallýrgiia kesheniniń júie quraýshy kásiporyndaryn aralady
primeminister.kz

Premer-ministr Oljas Bektenov Aqtóbe oblysyna jumys sapary aiasynda óńirdiń ónerkásiptik áleýetimen, iri óndiris oryndardyń qyzmetimen jáne investitsiialyq jobalardyń júzege asyrylý barysymen tanysty. Ónerkásipti damytý jáne elimizdiń óndiristik áleýetin nyǵaitý – Memleket basshysynyń «Jańa tarihi kezeńdegi Qazaqstannyń ózekti mindetteri» atty Qazaqstan halqyna Joldaýynda aiqyndalǵan basym baǵyttardyń biri, dep habarlaidy dalanews.kz.

Premer-ministr Hromtaý aýdanynda «Aqtóbe mys kompaniiasy» JShS (Kóktaý aýyly) mys jáne mys-myrysh kenderin óndirý jáne baiytý kásipornyna, Eurasian Resources Group kompaniialar tobynyń (Hromtaý qalasy) kásipornyna bardy.

«Aqtóbe mys kompaniiasy» JShS óndiristik alańynda Oljas Bektenov ken baiytý fabrikasy men mys kontsentratyn óndiretin taý-ken baiytý kombinatynyń jumysymen tanysty. Kúrdeli kenderden mys pen myryshty paidaly komponentterdiń joǵalýyn barynsha azaita otyryp, tiimdi bólip alýǵa múmkindik beretin selektivti jáne ujymdyq-selektivti flotatsiia tehnologiialary kórsetildi. Kásiporynda óndiris ónimdiligi men qaýipsizdigin arttyrýǵa baǵyttalǵan «Flotatsiia operatorynyń tsifrlyq kómekshisi» jáne taý-ken kóligin basqarýdyń avtomattandyrylǵan júiesi sekildi tsifrlyq otandyq ázirlemelerde qoldanylady.

«Aqtóbe mys kompaniiasy» JShS bas direktory Farit Sýfianov zaýyttyń óndiristik qýaty jylyna 5 mln tonna kendi óńdeýge jetetinin aitty. Kásiporyn óz jumysyn bastaǵaly beri óndiristi damytýǵa 407 mlrd teńge investitsiialanǵan, 2 myńnan astam jumys orny qurylǵan. Qazirgi ýaqytta seriktestik «Oktiabrge 50 jyl» jáne «Priorskoe» ken oryndarynda jerasty kenishterin salý, sondai-aq «Limannoe» ken ornynda óndirý jumystaryn keńeitý boiynsha jobalardy júzege asyrýda. Bul kásiporynnyń shikizat bazasyn keńeitýge jáne jańa jumys oryndaryn qurýǵa múmkindik beredi. Jańa jobalardy qosqanda investitsiialardyń jiyntyq kólemi eki esege artyp, 800 mlrd teńgeden asady.

«Qazhrom» TUK» AQ aýmaǵynda (ERG tobyna kiredi) Premer-ministr óndiristik kórsetkishtermen, investitsiialyq jobalardyń júzege asyrylý barysymen jáne ERG tobynyń Aqtóbe oblysyndaǵy kásiporyndaryn odan ári damytý josparlarymen tanysty. ERG-diń Qazaqstandaǵy bas direktory Kýdrát Shamiev tórt negizgi baǵytty qamtityn, jalpy investitsiia kólemi $3,4 mlrd bolatyn jańa investitsiialyq jobalar týraly habardar etti, olar: quny $1,3 mlrd bolatyn aliýminii klasterin qurý, $1 mlrd-qa jýyq qarajatqa energetikany damytý, $800 mln-nan astam qarjyǵa «Bolashaq» shahtasynyń ekinshi jáne úshinshi kezekterin salý, sondai-aq quny $300 mln bolatyn temir ken baiytý fabrikasyn salý.

Alǵashqy nysandardy kelesi jyly paidalanýǵa berý josparlanýda: qazirgi ýaqytta avtomobildiń aliýminii diskilerin shyǵarý zaýyty jobalanýda bolsa, odan bólek Aqtóbede kádege jaratý elektr stansasyn salý jáne gallii óndirisin iske qosý jobalary júzege asyrylmaq. 2028 jyly Aqsý elektr stansasynyń №7 energoblogyn iske qosý jáne Pavlodar aliýminii zaýytyn jańǵyrtýdyń birinshi kezeńin aiaqtaý josparlanýda. 2029 jyly «Tassai» jel elektr stansasyn, temir ken baiytý fabrikasyn iske qosý, Pavlodar aliýminii zaýytyn jańǵyrtýdyń ekinshi kezeńin aiaqtaý jáne QEZ-2 jańa elektroliz zaýytyn salý kózdelgen. 2030 jyly Shymkent JEO-3-te gaz týrbinalyq qondyrmany iske qosý, 2034 jylǵa deiin «Bolashaq» shahtasynyń ekinshi jáne úshinshi kezeńderin tolyq júzege asyrý josparlanyp otyr.

Premer-ministrge 2027 jyldyń sońyna qarai otandyq aliýminiiden jylyna 500 myńǵa deiin avtomobil diskilerin óndirý jónindegi josparlar týraly baiandaldy. Ónimder sonyń ishinde tiisti memorandýmdar jasalǵan Astana Motors jáne Hyundai avtoóndiristik kompaniialaryna baǵdarlanatyn bolady.

Oljas Bektenov óńirlerde ónerkásiptik negizdi damytýdyń mańyzdylyǵyn atap ótti.

«Memleket basshysy atap ótkendei, saiyp kelgende, qýatty aimaqtar kúshti memlekettiń negizin qalaidy. Osyǵan bailanysty aýmaqtardyń úilesimdi damýyn qamtamasyz etý, óńirlerdiń investitsiialyq tartymdylyǵyn arttyrý jáne olardyń ekonomikalyq áleýetin nyǵaitý máseleleri airyqsha mańyzǵa ie. Otandyq kásiporyndardy damytý, óndiristik qýattardy keńeitý jáne qosylǵan quny joǵary ónimder shyǵarý úshin qolaily jaǵdai jasaýǵa basa mán berý qajet», — dep atap ótti Premer-ministr. 

Nysandardy aralaý qorytyndysy boiynsha Premer-ministr kásiporyndardy odan ári tehnologiialyq jańǵyrtý men mineraldyq shikizatty óńdeýdi tereńdetýdi tapsyrdy. Iri kompaniialardyń satyp alýlaryndaǵy qazaqstandyq qamtý úlesin arttyrýǵa, otandyq óndirýshilermen sondai-aq shaǵyn jáne orta biznes sýbektilerimen yntymaqtastyqty keńeitýge basa nazar aýdaryldy.