Qazaqstan Halyq Keńesi Pavlodarda kásipodaq ókilderimen kezdesý ótkizdi

Qazaqstan Halyq Keńesi Pavlodarda kásipodaq ókilderimen kezdesý ótkizdi

Qazaqstan Halyq Keńesiniń bastamasymen jáne Pavlodar oblysy ákimdiginiń qoldaýymen óńirde Qazaqstannyń kásipodaq qozǵalysy ókilderimen kezdesý ótti, dep habarlaidy dalanews.kz.

Bir alańda Halyq Keńesiniń músheleri, Kásipodaqtar federatsiiasynyń ókilderi men eńbek ujymdarynyń músheleri bas qosyp, elimizdiń túrli salalary men óńirlerindegi eńbek adamdary úshin mańyzdy máselelerdi talqylady. Kezdesý barysynda áleýmettik-eńbek saiasatynyń negizgi baǵyttary, jumyskerlerdiń quqyqtaryn qorǵaý jáne eńbek qatynastaryn damytý máseleleri keńinen talqylandy. Is-shara qorytyndysy boiynsha kásipodaqtar Halyq Keńesine eńbek adamdarynyń múddelerin qorǵaýǵa jáne respýblikalyq deńgeidegi júieli sheshimder ázirleýge baǵyttalǵan 25 bastama usyndy.

Kezdesý Halyq Keńesiniń óńir turǵyndarymen jáne kásibi birlestiktermen ashyq ári tikelei dialog ornatý baǵytyndaǵy jumysynyń jalǵasy boldy. Osyndai kezdesýler eńbek ujymdarynyń usynys-pikirlerin tyńdap, olardyń ózekti máselelerin jan-jaqty zerdeleýge jáne aldaǵy ýaqytta tiisti sheshimder qabyldaý úshin naqty usynystar qalyptastyrýǵa jol ashady.

Bul dialogtyń keń aýqymdy bolýy, eń aldymen, kásipodaq qozǵalysynyń qanshalyqty keń qamtylýyna bailanysty. Qazaqstan Respýblikasy Kásipodaqtar federatsiiasynyń quramynda 2 millionǵa jýyq adamdy biriktiretin 24 salalyq kásipodaq pen 17 myńǵa jýyq bastaýysh kásipodaq uiymy bar. Kásipodaqtardyń osyndai keń ári tarmaqtalǵan jelisi túrli sala qyzmetkerleriniń talap-tilekterin júieleýge, olardy eńbek ujymdary deńgeiinde talqylaýǵa jáne jalpyulttyq mańyzy bar máselelerdi birlesken alańdarda kóterýge múmkindik beredi.

Qatysýshylar aldynda sóz sóilegen Erlan Qoshanov Memleket basshysynyń saiasatynda adal eńbektiń qadirin arttyrý men eńbek adamyna degen qurmetti nyǵaitýǵa airyqsha mán beriletinin atap ótti. «Jaýapty adam – Adal eńbek – Laiyqty jetistik» qaǵidaty memleket, biznes jáne qoǵam qyzmetinde myzǵymas baǵdarǵa ainalyp, olardyń qabyldaityn naqty sheshimderi men júzege asyratyn is-áreketterinen kórinis tabýy tiis. Bul rette jumys berýshilerdiń ustanymymen qatar, eńbek adamdarynyń óz pikirleri men usynystaryn da eskerý mańyzdy.

«Memleket basshysynyń bastamasymen qurylǵan Qazaqstan Halyq Keńesiniń basty maqsaty – azamattardyń únin estýge, olardy tolǵandyrǵan máselelerdiń sheshimin tabýǵa múmkindik berý. Elimizdiń tarihynda alǵash ret túrli áleýmettik toptardyń, kásibi qaýymdastyqtar men eńbek ujymdarynyń ókilderi bir konstitýtsiialyq organǵa biriktirilip otyr», – dep atap ótti Erlan Qoshanov.

Kezdesý barysynda áleýmettik áriptestikti damytý, eńbek quqyqtaryn qorǵaý, kásibi biliktilikti arttyrý, jastarǵa kásiptik baǵdar berý jáne olardy jumyspen qamtý, sondai-aq eńbek adamdarynyń óz múddelerine qatysty sheshimderdi talqylaýǵa qatysý múmkindigin keńeitý máseleleri qaraldy. Qatysýshylar eńbek ujymdary, kásipodaqtar, jumys berýshiler men memlekettik organdar arasyndaǵy turaqty ári ashyq keri bailanystyń mańyzdylyǵyn atap ótti. Mundai ózara is-áreket jekelegen ótinishterdi qaraýmen shektelmei, taraptar arasyndaǵy bailanysty jetildirýge baǵyttalǵan júieli usynystar ázirleýge múmkindik beredi.

«Kásipodaqtar federatsiiasy men Qazaqstan Halyq Keńesi – máni jaǵynan halyqtyq institýttar. Bizdi ortaq qundylyq – adam, onyń múddesi men el bolashaǵy biriktiredi. Halyq Keńesi qoǵamnyń ártúrli toptaryna jalpyulttyq máselelerdi talqylaýǵa qatysýǵa múmkindik beredi. Bul dialogta kún saiyn Qazaqstannyń damýyna úles qosyp júrgen eńbek adamdarynyń úni salmaqty estilýi mańyzdy», – dedi Qazaqstan Respýblikasy Kásipodaqtar federatsiiasynyń tóraǵasy Satybaldy Dáýletalin.

Jiynda jumysshy mamandyqtaryn qoldaý jáne ekonomikanyń jańa talaptaryna sai bilikti kadrlar daiarlaý máselelerine de erekshe nazar aýdaryldy. 2025 jyly Qazaqstanda 1,1 myńnan astam kásip túrin, onyń ishinde 600 jumysshy mamandyǵyn qamtityn 132 kásiptik standart ázirlenip, jańartyldy. Bul ózgerister eńbek naryǵynda zamanaýi biliktilikterge degen suranystyń artyp kele jatqanyn kórsetedi. Osyǵan bailanysty bilim berý uiymdary, kásiporyndar men kásibi birlestikter arasyndaǵy ózara is-qimyldy úilestirý mańyzdy.

Kezdesýdiń negizgi taqyryptarynyń biri – tsifrlyq platformalar arqyly júzege asatyn jumyspen qamtý máselesi boldy. Oǵan kólik tasymaly, jetkizý qyzmetteri jáne basqa da onlain-servister arqyly jumys isteý túrleri jatady. Qazirgi tańda bul sala aitarlyqtai basymdyqqa ie. Atap aitqanda, 35 internet-platforma arqyly shamamen 1 million adam qyzmet kórsetedi. Osy baǵyttyń damýy tsifrlyq platformalarmen ózara is-qimyl jasaýdyń túsinikti ári naqty erejelerin qalyptastyrýdy, áleýmettik kepildikterdi qamtamasyz etýdi jáne osyndai servister arqyly tabys tabatyn azamattardyń quqyqtary men múddelerin qorǵaýdy talap etedi.

Bul taqyryp Memleket basshysy Qasym-Jomart Toqaevtyń «Jańa tarihi kezeńdegi Qazaqstannyń ózekti mindetteri» atty Joldaýynda aiqyndalǵan mindettermen tikelei bailanysty. Prezident halyqtyq tsifrlyq ekonomikany qalyptastyrý baǵytyn belgilep, jyl sońyna deiin tsifrlyq jumyspen qamtýdyń jeńildetilgen quqyqtyq rejimin ázirleýdi tapsyrǵan bolatyn. Osyǵan orai, kezdesý barysynda tsifrlyq qyzmetterdiń damýy eńbek adamdarynyń quqyqtaryn qorǵaýmen jáne platformalyq ekonomikaǵa qatysýshylar úshin túsinikti ári qolaily eńbek jaǵdailaryn qalyptastyrýmen qatar júrýi qajettigi talqylandy.

Kún tártibindegi osy máselelermen qatar, avtomattandyrý men jasandy intellektiniń eńbek úderisterine yqpaly da sóz boldy. Jańa tehnologiialar qyzmetkerlerge qoiylatyn biliktilik talaptaryn ózgertip, jumysqa ornalasýdyń jańa múmkindikterin ashýmen qatar, ýaqytyly oqytý men qaita daiarlaýdyń mańyzyn arttyryp otyr. Osy oraida kásipodaq uiymdary atalǵan ózgeristerdi talqylaýǵa belsendi qatysyp, tehnologiialyq jańǵyrý úderisiniń adami kapitaldy damytý jáne jumyskerlerdiń áleýmettik qorǵalýyn qamtamasyz etý sharalarymen qatar júrýine yqpal ete alady.

Kezdesý barysynda «Eńbek daýysy» atty jumys tobyn qurý týraly usynysqa da erekshe nazar aýdaryldy. Bul top kásipodaqtar men eńbek ujymdary kótergen máselelerdi memlekettik organdar men depýtattardyń qatysýymen talqylaýǵa, sondai-aq olardy sheshýdiń naqty joldaryn, sonyń ishinde zańnamalyq sipattaǵy usynystardy ázirleýge arnalǵan ortaq alań bolmaq. Erlan Qoshanov bul bastamanyń mańyzdylyǵyna toqtalyp, ony kásipodaq ókilderimen birlese otyryp, jan-jaqty ári naqty pysyqtaý qajettigin jetkizdi.

Qazaqstan Halyq Keńesi kásipodaqtarmen yntymaqtastyqty jekelegen kezdesýlermen shektemei, turaqty ári júieli dialog negizinde damytýdy kózdeidi. Keńes kásipodaqtar, jumys berýshiler, sarapshylar men tiisti memlekettik organdardyń qatysýymen ortaq ustanymdardy qalyptastyryp, ózara kelisilgen sheshimder ázirleýge arnalǵan mańyzdy alań bolyp sanalady.

Kásipodaqtar tarapynan usynylǵan 25 bastama men kezdesýler barysynda aitylǵan ózge de usynystar júielenip, Halyq Keńesiniń aldaǵy jumysy aiasynda jan-jaqty qarastyrylatyn bolady.

Sapar barysynda Erlan Qoshanov bastaǵan Halyq Keńesiniń músheleri, onyń ishinde Vera Kim, Áset Qydyrmanov, Tólegen Kúnádilov, Liliia Stadnikova, Narine Mikaelian, Tursynbek Maqyshev, Nikolai Arsiýtin, Dmitrii Pavlenko jáne Boris Polomarchýk azamattyq qoǵam ókilderimen, jastar uiymdary jáne etnomádeni birlestikter múshelerimen kezdesti. Ashyq pikir almasý barysynda qatysýshylar Memleket basshysynyń Joldaýynda belgilengen mindetterdi júzege asyrýdyń naqty qadamdaryn talqylap, qoǵamdyq damýdyń ózekti máseleleri boiynsha usynys-pikirlerin ortaǵa saldy.