Qazaqstanda uialy bailanys nómiriniń merzimin uzartý degen syltaýmen azamattardy aldaityn alaiaqtar kóbeigen. Aqtóbede ekinshi kýrs stýdenti ózin uialy bailanys operatory men bank qyzmetkeri retinde tanystyrǵan alaiaqtarǵa senip, shamamen 10 million teńgesinen aiyrylǵan, dep habarlaidy dalanews.kz.
Vedomstvo málimetinshe, alaiaqtar qyzdy aqshasyn «qaýipsiz shotqa» aýdarýǵa kóndirgen. Ol belgisiz adamdardyń nusqaýyn oryndap, qomaqty qarjysynan aiyrylǵan.
Alaiaqtardan qalai qorǵanýǵa bolady?
Ishki ister ministrligi qazaqstandyqtardy telefon arqyly habarlasqan belgisiz adamdarǵa saq bolýǵa shaqyrdy.
Politsiia azamattarǵa myna jaittardy este saqtaýdy eskertedi:
- Bank pen uialy bailanys operatorynyń qyzmetkerleri eshqashan aqshany «qaýipsiz shotqa» aýdarýdy talap etpeidi;
- Ózin bank, quqyq qorǵaý organdary nemese basqa mekeme qyzmetkeri retinde tanystyrǵan belgisiz adamdardyń nusqaýymen qarjylyq operatsiia jasamaý kerek.
Eger osyndai kúmándi qońyraý tússe, áńgimeni toqtatyp, uiymnyń resmi nómirine ózińiz habarlasqan jón.