Arman Qyryqbaev AQSh-tyń Qazaqstandaǵy elshisi Djýli Stafftpen kezdesti

Arman Qyryqbaev AQSh-tyń Qazaqstandaǵy elshisi Djýli Stafftpen kezdesti
QR Mádeniet jáne aqparat ministrliginiń baspasóz qyzmeti

Qazaqstan Respýblikasynyń Mádeniet jáne aqparat ministri Arman Qyryqbaev AQSh-tyń Qazaqstan Respýblikasyndaǵy Tótenshe jáne Ókiletti Elshisi Djýli Stafftpen kezdesti, dep habarlaidy dalanews.kz.

Taraptar Qazaqstan men AQSh-tyń mádeniet, mass-media jáne mýzei isi salalaryndaǵy yntymaqtastyǵyn keńeitý múmkindikterin talqylady.

Kezdesý barysynda Arman Qyryqbaev Qazaqstan Respýblikasynyń Prezidenti Qasym-Jomart Toqaev pen AQSh Prezidenti Donald Tramp arasyndaǵy qarym-qatynastyń joǵary deńgeide ekenin erekshe atap ótti. Ministr eki el basshylarynyń keńeitilgen strategiialyq áriptestikti nyǵaitýda jáne ekijaqty yntymaqtastyqty damytýda sheshýshi ról atqaratynyn aitty.

Óz kezeginde Djýli Stafft Qazaqstan Prezidentiniń aldaǵy G20 sammitine qatysýyna daiyndyq jumystary qarqyndy júrip jatqanyn oń baǵalady. Memleket basshysy 14-15 jeltoqsanda Maiamide ótetin sammitke AQSh Prezidenti Donald Tramptyń shaqyrýymen qatysady. Elshi aldaǵy sammittiń Qazaqstan men AQSh arasyndaǵy qarym-qatynasty odan ári tereńdetip, túrli baǵyttaǵy yntymaqtastyqty keńeitý úshin mańyzdy ekenin atap ótti.

Elshiniń ótinishi boiynsha ministr Quryltaida qaralyp jatqan onlain-platformalar men mass-media salasyndaǵy zańnamalyq túzetýler týraly aqparat berdi. Usynylǵan ózgerister azamattardyń quqyqtaryn qorǵaýǵa, balalardyń internettegi qaýipsizdigin qamtamasyz etýge, quqyqqa qaishy kontenttiń taralýyna tosqaýyl qoiýǵa jáne onlain-platformalardyń jaýapkershiligin arttyrýǵa baǵyttalǵan. Osy oraida Qazaqstannyń tsifrlyq ortany retteý jónindegi halyqaralyq tájiribeni, sonyń ishinde AQSh tájiribesin zerdeleýge múddeli ekeni aityldy.

Taraptar mýzei salasyndaǵy yntymaqtastyqty damytýǵa da erekshe nazar aýdardy. Elshi Djýli Stafft eki el mýzeileri arasyndaǵy kásibi bailanysty nyǵaitýdyń mańyzyn atap ótti. Sondai-aq birlesken bastamalardy júzege asyrýǵa, sonyń ishinde Qazaqstan mýzeileriniń jádigerlerin AQSh-ta kórmege qoiýǵa qoldaý kórsetýge daiyn ekenin bildirdi.

Arman Qyryqbaev amerikalyq mýzeilerdiń tájiribesin zerdeleýge, mýzei isindegi zamanaýi tásildermen tanysýǵa jáne jańa kásibi bailanystar ornatýǵa múmkindik beretin bastamasy úshin elshige alǵys aitty.

Kezdesý qorytyndysynda taraptar mádeni-gýmanitarlyq bailanystardy odan ári nyǵaitýǵa jáne birlesken jobalardy júzege asyrýǵa múddeli ekenin rastady.