Pew Research Center zertteý ortalyǵynyń boljamynsha, 2035 jylǵa qarai álemdegi musylmandar sany hristiandardan asyp, eń iri dini topqa ainalýy múmkin. Buǵan eń aldymen týý kórsetkishiniń joǵary bolýy men musylman halyqtarynyń jas quramynyń ereksheligi áser etedi, dep habarlaidy dalanews.kz.
Zertteý derekterine sáikes, 2020 jyly álemde 2,02 mlrd musylman jáne 2,27 mlrd hristian bolǵan. Al 2035 jylǵa qarai musylmandar sany 2,57 mlrd-qa, hristiandar sany 2,52 mlrd-qa jetedi dep boljanyp otyr.
Ortalyqtyń esebinshe, 2070 jylǵa qarai musylmandar sany 3,64 mlrd adamǵa deiin ósedi. Hristiandar sany shamamen 2,96 mlrd bolady. Osylaisha, musylmandar álem halqynyń 36%-yn, al hristiandar 29%-yn quraýy múmkin.
Zertteýshiler mundai ózgeristiń basty sebebin týý deńgeiimen bailanystyrady. 2020–2025 jyldary musylman áielderge shaqqandaǵy bala týý koeffitsienti 3,1 bolsa, hristian áielder arasynda bul kórsetkish 2,5 bolǵan. Basqa dini toptardaǵy áielder úshin ortasha kórsetkish 1,6 balany quraǵan.
Musylman qaýymynyń jas quramy da halyq sanynyń ósýine yqpal etedi. 2020 jyly musylmandardyń ortasha jasy 24 bolsa, basqa din ókilderinde bul kórsetkish 33 jas bolǵan.
Pew málimetinshe, dini senimin ózgertý de demografiialyq úderiske áser etedi. Alaida bul faktordyń yqpaly týý men ólim kórsetkishterine qaraǵanda áldeqaida tómen.
Zertteýde basqa dini toptarǵa qatysty da boljamdar keltirilgen. 2070 jylǵa qarai býddister sany 2020 jylǵy 324 mln-nan 235 mln-ǵa deiin azaiýy múmkin. Al dinge qatystylyǵyn kórsetpeitin adamdardyń álem halqy ishindegi úlesi 24%-dan 17%-ǵa deiin tómendeidi dep kútilýde.
Sonymen qatar indýizm men iýdaizmdi ustanýshylardyń sany absoliýtti kórsetkish boiynsha óskenimen, olardyń álem halqy ishindegi úlesi azaiýy yqtimal.
Aita keteiik, zertteý 2020–2070 jyldar aralyǵyndaǵy demografiialyq ózgeristerdi qamtidy jáne 201 el men aýmaqtyń derekterine negizdelgen. Boljamda halyqtyń jas quramy, týý men ólim deńgeii, kóshi-qon jáne dini tiistiliktiń ózgerýi eskerilgen. Zertteý avtorlary bul esep bolashaqtaǵy barlyq yqtimal oqiǵalardy qamtymaitynyn atap ótedi.