29 jastaǵy tanymal ázilkesh operatsiia kezinde kóz jumdy

29 jastaǵy tanymal ázilkesh operatsiia kezinde kóz jumdy

Qyrǵyzstandyq tanymal stendap-komik Eldos Almazov 29 jasynda ómirden ótti. Óner iesi uzaq ýaqyt boiy qaterli isikpen kúresip, kezekti operatsiia kezinde qaitys bolǵan. Qaiǵyly habardy onyń jaqyndary áleýmettik jeli arqyly jetkizdi, dep habarlaidy dalanews.kz.

Eldos Almazovtyń qazasy týraly aqparat onyń Telegram arnasynda jariialanǵan. Qaraly habardy ázilkeshtiń nemere ápkesi jetkizgen. Týysynyń aitýynsha, óner iesi uzaq ýaqyt boiy súiek tininiń qaterli isigi – osteosarkomamen kúresken. Osy ýaqyt aralyǵynda ol birneshe márte himioterapiia kýrsynan ótip, isikti alyp tastaý maqsatynda hirýrgiialyq operatsiialar jasatqan. Alaida kezekti ota kezinde ázilkeshtiń ómiri úzilgen.

Óner iesiniń jaqyndary onyń qazasy búkil otbasy úshin orny tolmas aýyr qaiǵy bolǵanyn jetkizdi.

"Keshe operatsiia kezinde Eldostan aiyrylyp qaldyq. Bul bárimiz úshin, ásirese onyń ata-anasy úshin orny tolmas qaiǵy", – delingen Telegram arnasynda jariialanǵan habarlamada.

Eldos Almazovtyń týystary men jaqyndary onyń ómirden erte ketkenin aýyr qabyldap jatqanyn málimdegen. Jas ázilkesh sońǵy ýaqytqa deiin aýrýymen kúresip, densaýlyǵyn qalpyna keltirýge úmittengen.

Biyl qazan aiynda Eldos Almazov áleýmettik jelidegi oqyrmandaryna densaýlyq jaǵdaiynyń nasharlaǵanyn habarlaǵan edi. Onyń aitýynsha, kezekti himioterapiia kýrsynan keiin ózin jaisyz sezine bastaǵan. Atap aitqanda, kózi aýyryp, basy ainalyp, júregi ainyǵan. Densaýlyǵynyń nasharlaǵany sonshalyq, tipti telefon paidalanýdyń ózi qiynǵa soqqan. Sol kezde ázilkesh áleýmettik jelidegi belsendiligin ýaqytsha toqtatýǵa májbúr bolǵan. Ol oqyrmandarynan túsinistik tanytyp, densaýlyǵyn qalpyna keltirý úshin ýaqyt berýin suraǵan.

Eldos Almazov kim?

Eldos Almazov – Qyrǵyzstanda dúniege kelgen, Reseidegi stendap jobalary arqyly keńinen tanylǵan ázilkesh. Ol 29 jasynda ómirden ótti. Óner iesi Qyrǵyzstannyń Osh oblysynda týǵan.

Genetikalyq ereksheligine bailanysty onyń boiy shamamen 130 santimetr bolǵan. Alaida Eldos bul ereksheligin sahnada jasyrmai, kerisinshe, óz ázilderiniń bir bóligine ainaldyra bilgen.

Ol kórermenge ózin erkin ustaityn, ómirdegi túrli jaǵdailardy ázilmen jetkizetin komik retinde tanyldy.

2018 jyly Eldos Almazov Máskeýge qonys aýdarǵan. Al 2021 jyly Reseidiń TNT telearnasyndaǵy tanymal "Otkrytyi mikrofon" ázil-syqaq jobasyna qatysqan. Baǵdarlama barysynda ol belgili stendap-komik Aleksei Sherbakovtyń komandasyna qosylyp, jartylai finalǵa deiin jetken. Osy joba jas ázilkeshtiń tanymaldyǵyn arttyryp, onyń ónerin keń aýditoriiaǵa tanystyrdy.