Shymkenttegi Áýezov ýniversiteti ulttyq mártebege ie bolady

Shymkenttegi Áýezov ýniversiteti ulttyq mártebege ie bolady
Ashyq derekkóz

Prezident Qasym-Jomart Toqaev Muhtar Áýezov atyndaǵy Ońtústik Qazaqstan ýniversitetine ulttyq mártebe berý týraly sheshim qabyldady. Memleket basshysy bul týraly III Strategiialyq seriktester forýmynda málimdedi, dep habarlaidy dalanews.kz.

Prezidenttiń aitýynsha, Qazaqstannyń Astana men Almatydan keiingi úshinshi iri qalasy sanalatyn Shymkentti ońtústik óńirdegi ǵylym jáne bilim ortalyǵy retinde damytý kózdelip otyr.

Qazirdiń ózinde qalada birqatar halyqaralyq bilim berý jobasy júzege asyrylýda. Atap aitqanda, Arizona shtaty ýniversitetiniń bilim berý baǵdarlamasy engizilip, Túrkiianyń Gazi ýniversitetiniń filialy ashylǵan.

«Bul jumysty odan ári jandandyryp, Shymkenttiń ǵylym jáne bilim salasyndaǵy áleýetin kúsheite túsýimiz qajet. Men halqymyzdyń zańǵar jazýshysy Muhtar Áýezov atyndaǵy Ońtústik Qazaqstan ýniversitetine ulttyq mártebe berý týraly sheshim qabyldadym», – dedi Qasym-Jomart Toqaev.

Memleket basshysy Áýezov ýniversitetin aimaqtaǵy eń iri joǵary oqý orny dep atap ótti. Onyń málimetinshe, Shymkenttegi árbir besinshi stýdent osy ýniversitette bilim alady.

Prezident ulttyq mártebe berý ýniversitetke ǵana emes, jaýapty ministrlikke de úlken mindet júkteitinin aitty. Onyń pikirinshe, oqý orny sapaly bilim men tereń ǵylymnyń oshaǵyna, óńirdiń ziiatkerlik ortalyǵyna ainalýǵa tiis.