Shymkentte eńbek jáne áleýmettik qorǵaý departamentiniń burynǵy basshysy para bergeni úshin sottaldy

Shymkentte eńbek jáne áleýmettik qorǵaý departamentiniń burynǵy basshysy para bergeni úshin sottaldy
JI: Dalanews.kz

Shymkentte Eńbek jáne áleýmettik qorǵaý komiteti departamentiniń burynǵy basshysy men Tótenshe jaǵdailar departamentiniń aýdandyq bólimshesiniń burynǵy bas mamany sottaldy. Ekeýine de aiyppul salynyp, memlekettik qyzmette jumys isteýge ómir boiyna tyiym salyndy, dep habarlaidy dalanews.kz.

Oqiǵa qalai bolǵan?

Hronika.kz málimetinshe, 2026 jylǵy mamyrda Shymkent qalasy Turan aýdany Tótenshe jaǵdailar bóliminiń bas mamany Azamat Buldyryqov eńbek jáne áleýmettik qorǵaý departamentiniń keńselerinde profilaktikalyq tekserý júrgizgen.

Tekserý barysynda órt qaýipsizdigi jáne ózge de qaýipsizdik talaptarynyń 23 ret buzylǵany anyqtalǵan.

Sol kezdegi departament basshysy Rýslan Tuńǵyshbaev esepke tek jedel túrde joiý múmkin emes nemese ony túzetý qomaqty shyǵyndy talap etetin, sondai-aq óz quzyretine kirmeitin zańbuzýshylyqtardy ǵana engizýdi usynǵan. Qalǵan eskertýlerdi qujattan alyp tastaýdy suraǵan.

Is materialdaryna sáikes, osy qyzmeti úshin Tuńǵyshbaev Buldyryqovqa 100 myń teńge bergen. Sonyń nátijesinde qorytyndy esepke anyqtalǵan 23 zańbuzýshylyqtyń ornyna 16-sy ǵana engizilgen.

Sot qandai sheshim shyǵardy?

Shymkent qalasynyń aýdanaralyq qylmystyq soty eki aiyptalýshyny da kináli dep tanydy. Azamat Buldyryqov Qylmystyq kodekstiń 366-baby 1-1-bóligi («Para alý»), al Rýslan Tuńǵyshbaev 367-babynyń 1-bóligi («Para berý») boiynsha jaýapqa tartyldy.

Ekeýi de kinásin tolyq moiyndaǵandyqtan, is qysqartylǵan tártippen qaralǵan.

Olarǵa qandai jaza taǵaiyndaldy?

Sot sheshimimen Azamat Buldyryqov 2,5 million teńge, al Rýslan Tuńǵyshbaev 1,5 million teńge aiyppul tóleýge mindetteldi. Budan bólek, ekeýine de memlekettik qyzmette laýazym atqarýǵa ómir boiyna tyiym salyndy. Sottalǵandar birinshi satydaǵy sot sheshimine shaǵym túsirmegen. Úkim zańdy kúshine endi.