«Samuryq-Qazynadaǵy» taǵy bir qyzmetker tergeýge alyndy

«Samuryq-Qazynadaǵy» taǵy bir qyzmetker tergeýge alyndy
Ashyq derekkóz

«Samuryq-Qazyna» ulttyq ál-aýqat qorynda taǵy bir qyzmetker ustaldy. Bul joly qordyń satyp alýdy ádisnamalyq qamtamasyz etý, baqylaý jáne monitoring departamentiniń direktory tergeýge alynǵan, dep habarlaidy dalanews.kz.

Qordyń baspasóz qyzmeti qyzmetkerdiń ustalǵanyn rastaǵan. Alaida onyń qazirgi qyzmetine qatysty emes ekenin málimdedi.

«Qolda bar aqparatqa sáikes, qor departamentteriniń biriniń qyzmetkerin ustaý onyń burynǵy eńbek qyzmetine bailanysty mán-jailarǵa qatysty jáne qazirgi laýazymdyq mindetterin oryndaýyna qatysy joq», – dep habarlady qordyń baspasóz qyzmeti.

Ulttyq qaýipsizdik komiteti tergeý barysyna qatysty ázirge málimet bergen joq.

Jańa epizodtardyń Jaqupov pen Otynyshevtiń isimen bailanysy bar-joǵy ázirge belgisiz. Bul týraly «Za nami ýje vyehali» basylymy habarlady.