1 shilde kúni Almaty qalasy Jastar saıasaty basqarmasynyń qoldaýymen, Sybaılas jemqorlyqqa qarsy volonterlik joba aıasynda Alataý aýdany, Zerdeli shaǵyn aýdanynda jastardy adaldyq pen ádilettilikke, zańǵa baǵyný men qoǵamdyq tártipti ustanýǵa úndeıtin kórkem joba — «Adal urpaq – jemqorlyqsyz bolashaq» atty mýraldyń saltanatty ashylý rásimi ótti,- dep habarlaıdy Dalanews.kz  

Ashylý saltanatyna Almaty qalasy Jastar saıasaty basqarmasy basshysynyń orynbasary Kenesbaı Almaz Abaıuly, Sybaılas jemqorlyqqa qarsy volonterlik jobanyń jetekshisi Kenesov Ákejan Baqytuly, Alataý aýdany ákimdiginiń mádenıet jáne tilderdi damytý bóliminiń basshysy Qaldarbekov Erbol Ospanuly, Asyl qazyna qoǵamdyq qorynyń tóraǵasy Moldahan Orynbek Temirbekuly, qoǵam belsendileri men jastar qatysty.

Mýraldyń mazmunynda eńbek adamy – dáriger, qurylysshy, polısıa qyzmetkeri beınelenip, adal eńbektiń qoǵamdaǵy mańyzyn kórsetý kózdelgen. Bul Memleket basshysy jarıalaǵan «Jumysshy mamandyqtar jyly» aıasyndaǵy «Zań men tártip» qaǵıdatyna sáıkes, turaqty damý negizin nasıhattaıdy.

Búginde atalmysh volonterlik joba aıasynda 300-ge jýyq jas belsendi qatysýda. Olar memlekettik satyp alý prosesteri men qurylys nysandarynda ashyqtyqty qamtamasyz etý maqsatynda qoǵamdyq baqylaý júrgizip, quqyqtyq jáne mádenı saýattylyqty arttyrý baǵytyndaǵy is-sharalarǵa uıytqy bolýda.

«Adal urpaq – jemqorlyqsyz bolashaq» mýraly — bolashaq urpaqqa ádiletti qoǵamnyń beınesin usynatyn kórkem úndeý ǵana emes, sonymen birge jastardy qoǵamdyq jaýapkershilikke baýlıtyn mańyzdy tárbıelik qural.

İs-sharaǵa qatysyp, qoldaý bildirgen barsha azamattarǵa uıymdastyrýshylar alǵys bildirdi.

Zań men tártipke negizdelgen qoǵam – jarqyn bolashaq kepili.