Batými qalasynda (Grýziia) 8, 10 jáne 12 jasqa deiingi jas sanattaryndaǵy iýniorlar arasyndaǵy FIDE Álem kýbogy máresine jetti. Týrnirde Qazaqstannyń jas shahmatshylary jarqyn oiyn kórsetip, eki júldege ie boldy! Bul týraly Qazaqstan shahmat federatsiiasynyń baspasóz qyzmeti habarlady. Astanalyq Alisha Bisalieva altyn medal, al Ádinur Ádilbek qola medalǵa ie boldy, dep habarlaidy Dalanews.kz.
Birinshi kezeńde ár jas sanatyndaǵy uldar men qyzdar ortasha reitingke sáikes eki topqa bólinip, shveitsarlyq júie boiynsha 90+30 ýaqyt baqylaýymen 7 týr oinady. Ekinshi kezeńde ár topta birdei oryn alǵan shahmatshylar ózara match oinap, jeńimpaz anyqtaldy: eki klassikalyq partiia (90+30), teń jaǵdaida – eki rapid partiiasy (15+2), teń tússe – blits (3+2) formatynda sheshýshi jeńiske deiin jalǵasatyn oiyn.
8 jasqa deiingi qyzdar sanatynda 2025 jylǵy mektep oqýshylary arasyndaǵy álem chempiony (U9) Alisha Bisalieva taǵy da óz sheberligin dáleldedi. Finalda ol Varvara Volkovadan (FID) eki partiiada basym túsip, Qazaqstan qorjynyna altyn medal saldy!
Osy jas sanatyndaǵy uldar arasynda óner kórsetken Ádinur Ádilbek te tamasha nátijege qol jetkizdi – ol úshinshi oryn úshin matchta Bogdan Kalinindi (FID) 1½–½ esebimen jeńip, qola medal ielendi.
Sonymen qatar Qostanai oblysynan kelgen Iman Nábiev te jaqsy nátije kórsetti. Ol 10 jasqa deiingi sanatta qola medal úshin talasyp, úndistandyq Aarit Kapilge ese jiberip, tórtinshi orynǵa turaqtady.
Qazaqstandyq kadetter álemdik arenada ózderin senimdi tanyta bildi. Batými qalasyndaǵy bul jetistikter – olardyń talanty men eńbekqorlyǵynyń aiǵaǵy. Jas daryndar elimizdiń shahmat bolashaǵyna zor úmit uialatady!
