باتۋمي قالاسىندا (گرۋزيا) 8، 10 جانە 12 جاسقا دەيىنگى جاس ساناتتارىنداعى يۋنيورلار اراسىنداعى FIDE الەم كۋبوگى مارەسىنە جەتتى. تۋرنيردە قازاقستاننىڭ جاس شاحماتشىلارى جارقىن ويىن كورسەتىپ، ەكى جۇلدەگە يە بولدى! بۇل تۋرالى قازاقستان شاحمات فەدەراسياسىنىڭ باسپا ءسوز قىزمەتى حابارلادى. استانالىق اليشا بيسالييەۆا التىن مەدال، ال ءادينۇر ادىلبەك قولا مەدالعا يە بولدى، دەپ حابارلايدى Dalanews.kz.
ءبىرىنشى كەزەڭدە ءار جاس ساناتىنداعى ۇلدار مەن قىزدار ورتاشا رەيتينگكە سايكەس ەكى توپقا ءبولىنىپ، شۆەيسارلىق جۇيە بويىنشا 90+30 ۋاقىت باقىلاۋىمەن 7 تۋر وينادى. ەكىنشى كەزەڭدە ءار توپتا بىردەي ورىن العان شاحماتشىلار ءوزارا ماچ ويناپ، جەڭىمپاز انىقتالدى: ەكى كلاسسيكالىق پارتيا (90+30)، تەڭ جاعدايدا – ەكى راپيد پارتياسى (15+2)، تەڭ تۇسسە – بليس (3+2) فورماتىندا شەشۋشى جەڭىسكە دەيىن جالعاساتىن ويىن.
8 جاسقا دەيىنگى قىزدار ساناتىندا 2025 جىلعى مەكتەپ وقۋشىلارى اراسىنداعى الەم چەمپيونى (U9) اليشا بيسالييەۆا تاعى دا ءوز شەبەرلىگىن دالەلدەدى. فينالدا ول ۆارۆارا ۆولكوۆادان (FID) ەكى پارتيادا باسىم ءتۇسىپ، قازاقستان قورجىنىنا التىن مەدال سالدى!
وسى جاس ساناتىنداعى ۇلدار اراسىندا ونەر كورسەتكەن ءادينۇر ادىلبەك تە تاماشا ناتيجەگە قول جەتكىزدى – ول ءۇشىنشى ورىن ءۇشىن ماچتا بوگدان كالينيندى (FID) 1½–½ ەسەبىمەن جەڭىپ، قولا مەدال يەلەندى.
سونىمەن قاتار قوستاناي وبلىسىنان كەلگەن يمان نابييەۆ تە جاقسى ناتيجە كورسەتتى. ول 10 جاسقا دەيىنگى ساناتتا قولا مەدال ءۇشىن تالاسىپ، ءۇندىستاندىق ااريت كاپيلگە ەسە جىبەرىپ، ءتورتىنشى ورىنعا تۇراقتادى.
قازاقستاندىق كادەتتەر الەمدىك ارەنادا وزدەرىن سەنىمدى تانىتا ءبىلدى. باتۋمي قالاسىنداعى بۇل جەتىستىكتەر – ولاردىڭ تالانتى مەن ەڭبەكقورلىعىنىڭ ايعاعى. جاس دارىندار ەلىمىزدىڭ شاحمات بولاشاعىنا زور ءۇمىت ۇيالاتادى!
