Almaty oblysynda 10 jasar balany it talap tastaǵan oqiǵaǵa qatysty ekinshi taraptyń pikiri belgili boldy. Itterdiń iesi, ońaltý ortalyǵynyń direktory Almaz Haliev jaǵdaidyń basqasha órbigenin aitady, dep habarlaidy Dalanews.kz.
Halievtiń sózinshe, ortalyqtyń janynda oinap júrgen eki bala qorshaýǵa shyǵyp, aýladaǵy itterdi yzalandyrǵan. Itter ortalyq aýmaǵynda erkin júrgen eki bes ailyq kúshikter eken. Al eresek itter jabyq volerde bolǵan.
«Balalar qorshaýdyń ústine shyǵyp alyp, itterdi ashýlandyrǵan. Bir sátte balalardyń biri ekinshisin aýla ishine iterip jibergen. Bizde munyń bári beinejazbada bar. Bala aýlaǵa qulap, aiqailaǵan soń, ekinshisi kómek shaqyrý úshin júgirip ketken», – deidi ol.
Ortalyq basshysynyń aitýynsha, balaǵa shabýyldaǵan – álgi eki kúshik bolǵan. Onyń sózinshe, olar qaqpadan óz betterimen shyǵa almaǵan. Balaǵa kómekke kelgen azamat qaqpany ózi ashyp, ishke kirgen kórinedi.
«Álgi adam balany qutqarý úshin ishke kirgenin túsinemin. Biraq ol múlde ziiany joq eki kúshikti pyshaqtap tastaǵan. Endi olardy «syrtqa shyǵyp, balany qýyp jetip talady» dep jatyr. Olardyń psihikasy áli tolyq qalyptaspaǵan, agressiiasy joq. Aýmaqtan syrtqa shyǵýy múmkin emes. Bári ishte bolǵan», – dep túsindiredi Haliev.
Ol itterdiń ortalyq aýmaǵynda ómir súretinin jáne belgili bir dárejede kúzet qyzmetin atqaratynyn moiyndaidy. Haliev janýarlardy ustaý talaptary tolyq saqtalǵanyn jáne qorshaýda bes jyldan beri «Abailańyz, qabaǵan itter!» degen eskertý taqtaishasy ilinip turǵanyn jetkizdi.
Eske salaiyq, Almaty oblysynyń Qarasai aýdanyna qarasty aýylda 10 jastaǵy balany eki qabaǵan it talap, aýyr jaraqattady. Oqiǵa 30 mamyrda bolǵan.
Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizý úshin bara jatqanda, bir top balanyń shýlap, jan-jaqqa qasha jónelgenin kórgen.
Qazir 10 jastaǵy bala Qarasai aýdandyq ortalyq aýrýhanasynda aýyr jaraqatpen em alyp jatyr.
Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
Buǵan deiin Oblystyq densaýlyq saqtaý basqarmasy balanyń jaǵdaiy týraly aitqan edi.
Sonymen qatar, isti prokýratýra baqylaýyna aldy.
