Almaty oblysyndaǵy Kemertoǵan aýylynyń infraqurylymyn jańǵyrtýǵa 4,8 mlrd teńge qajet, dep habarlaidy Dalanews.kz.
Almaty qalasyna irgeles ornalasqan Qarasai aýdanyna qarasty Kemertoǵan aýylynda aýyzsý tapshylyǵy jyldar boiy sheshimin tappai keledi. 20 myńǵa jýyq turǵyny bar eldi mekende ortalyqtandyrylǵan sý júiesi bar bolǵanymen, tehnikalyq jaǵdaiy syn kótermeidi. Qubyrlardaǵy qysym tym álsiz. Keibir kóshelerge múlde sý jetpeidi. Turǵyndar tirshilikke qajetti sýdy túngi ýaqytta ydyspen jinap, kúndelikti sharýalaryn soǵan beiimdeýge májbúr.
«Qala irgesinde otyrsaq ta, sýdy shelektep tasimyz. Kóbimiz qudyqtan ishemiz. Jerden 13–14 metr tereńdikten alynǵan sýdyń sapasy nashar. Tunbasy, iisi bar. Mundai sýdy ishý túgili, kir jýýǵa da kelmeidi. Qubyr tartylǵanymen, qysym joq. Sý tek túnde syzdyqtap aǵady. Qazir aýyldyń tek 20 paiyzy ǵana ortalyqtandyrylǵan sýmen qamtylǵan. Biz Qaskeleń toptyq sý qubyry jobasyna da kirmeimiz. Qazir sýdy «BeyAzhTrans» JShS men «Taýsamaly-Qyzmet» MKK jetkizip otyr. Biraq olardyń uńǵymalary álsiz ári tozǵan. Osy máseleni shyndap kóterý úshin AMANAT partiiasynyń Májilis depýtattaryn arnaiy shaqyrttyq. Olar kelip, halyqtyń jaǵdaiyn kórip otyr», – deidi aýyl turǵyny, ardager Eginbek Egeýbekov.
Turǵyndardyń aitýynsha, másele tek sýmen qamtýda emes, onyń sapasynda da. Raýshan Jumataeva esimdi turǵynnyń sózinshe, kóptegen jeke skvajinalar ruqsatsyz qazylyp, sanitarlyq talaptar saqtalmaǵan.
«Bul sýdyń sapasy óte nashar. Tehnikalar buzylady. Batareialar bitelip, múlde jaramsyz bolyp qaldy. Eń bastysy – bul turǵyndardyń densaýlyǵyna qaýip tóndiredi. Osy máseleni birneshe ret Májiliste kóterdik. Endi jobany qarjylandyrý qajet. Qujattar daiyn, saraptamadan ótti. 600 mln teńge jergilikti deńgeide qarastyrylǵan. Biraq qalǵan qarajat respýblikalyq biýdjetten bólinbese, bul másele taǵy uzaqqa sozylyp ketýi múmkin», – dedi ol.
Máseleni kózben kórip, turǵyndarmen ashyq formatta pikirlesý úshin QR Parlamenti Májilisiniń depýtattary Maksim Rojin men Daniiar Qasqaraýov Kemertoǵanǵa arnaiy keldi.
Depýtat Maksim Rojinniń aitýynsha, bul másele bir jarym jyl buryn Qaskeleńdegi qoǵamdyq qabyldaýda alǵash ret kóterilgen. Sol joly 20-dan astam túitkil tirkelip, sonyń kóbi sheshimin tapqan. Al qazir Kemertoǵan úshin eń ózekti másele – taza aýyzsýǵa qol jetkizý.
«Qazir aýylda 4500-den astam úi ortalyq sý júiesine qosylmaǵan. Turǵyndar ártúrli tarifpen, sapasy kúmán týdyratyn jeke uńǵymalardan sý tutynyp otyr. Qajetti qujattar men jer telimi daiyn. Endi basty maqsat – respýblikalyq biýdjetten qarjy tartý. Bul másele Úkimet qaraýyna usynyldy. Premer-Ministr tarapynan baqylaýǵa alyndy. Biýdjet naqtylanǵanda qarjy bólinýi tiis. Bul másele «AMANAT» partiiasynyń tikelei baqylaýynda. Partiianyń «Halyqpen birge!» sailaýaldy baǵdarlamasynda infraqurylymdy jańǵyrtý negizgi basymdyqtardyń biri retinde belgilengen», – dedi Májilis depýtaty Maksim Rojin.
Onyń málimetinshe, jobalyq-smetalyq qujattama aiasynda jalpy uzyndyǵy 184,8 shaqyrym bolatyn sý qubyry, eki rezervýar, úsh nasos stantsiiasy, dizel generatory jáne transformatorlyq qosalqy stantsiia salý josparlanǵan. Qurylys aiaqtalǵan jaǵdaida 20 myńǵa jýyq turǵyn sapaly aýyzsýmen qamtylatyn bolady.
Aita keteiik, Qarasai aýdanynda osyǵan uqsas jobalar kezeń-kezeńimen júzege asyp keledi. Qazirgi tańda Jańaturmys pen Qaratóbe aýyldarynda sý júiesiniń qurylysy júrip jatyr. Eltai, Jarmuhambet, Shalqar jáne Qairat aýyldarynda da jumystar bastalǵan. Bul jobalarǵa 1,7 mlrd teńge bólingen.
