Túrkistan oblysyndaǵy «Samǵaý» ońaltý ortalyǵynda Túrkistan oblystyq prokýratýrasynyń Basqarma aǵa prokýrory Serikbolsyn Zaýrbekov pen oblys prokýrorynyń kómekshisi Didara Abdrasilova erekshe qajettilikteri bar azamattar úshin jeke qabyldaý ótkizdi,- dep habarlaidy Dalanews.kz
Shara barysynda azamattar ózderin mazalaǵan áleýmettik jáne quqyqtyq máselelerin ortaǵa salyp, tiisti keńester aldy. Prokýratýra ókilderi árbir ótinishti muqiiat tyńdap, zań aiasynda jaýap berdi. Sondai-aq birqatar máseleni baqylaýǵa alatyndaryn aitty.
Oblys prokýratýrasy «Zań men Tártip» qaǵidaty aiasynda múmkindigi shekteýli azamattardyń quqyqtaryn qorǵaý baǵytyndaǵy jumysyn jalǵastyrýda. Túrkistanda múmkindigi shekteýli azamattardy jeke qabyldaýdyń basty maqsat – quqyqtyq saýattylyqty arttyrý jáne azamattardyń zańdy múddelerin qorǵaýǵa qoldaý kórsetý. Mundai kezdesýler halyq pen bilik arasyndaǵy bailanysty nyǵaitýǵa baǵyttalǵan.
Búginde oblys aýmaǵynda 101 557 múmkindigi shekteýli azamat tirkelgen. Prokýratýra organdarynyń qadaǵalaý jumystarynyń nátijesinde kóptegen múgedek jannyń quqyǵy qorǵaldy. Máselen, «Avtomobil kóligi týraly» zań talaptaryna sáikes, birinshi toptaǵy múgedekter men birqatar áleýmettik top ókilderi úshin qalalyq jáne qala mańyndaǵy kólikpen tegin nemese jeńildikpen júrý quqyǵy qarastyrylǵan. Alaida oblystyń keibir aimaqtarynda bul talaptardyń oryndalmaýy anyqtalǵan. Jetisai, Maqtaaral aýdandary men Kentaý qalasynda júrgizilgen tekseris nátijesinde 3263 múmkindigi shekteýli azamattyń quqyǵy qalpyna keltirildi.
