تۇركىستان وبلىسىنداعى «سامعاۋ» وڭالتۋ ورتالىعىندا تۇركىستان وبلىستىق پروكۋراتۋراسىنىڭ باسقارما اعا پروكۋرورى سەرىكبولسىن زاۋربەكوۆ پەن وبلىس پروكۋرورىنىڭ كومەكشىسى ديدارا ابدراسيلوۆا ەرەكشە قاجەتتىلىكتەرى بار ازاماتتار ءۇشىن جەكە قابىلداۋ وتكىزدى،- دەپ حابارلايدى Dalanews.kz  

شارا بارىسىندا ازاماتتار وزدەرىن مازالاعان الەۋمەتتىك جانە قۇقىقتىق ماسەلەلەرىن ورتاعا سالىپ، ءتيىستى كەڭەستەر الدى. پروكۋراتۋرا وكىلدەرى ءاربىر ءوتىنىشتى مۇقيات تىڭداپ، زاڭ اياسىندا جاۋاپ بەردى. سونداي-اق ءبىرقاتار ماسەلەنى باقىلاۋعا الاتىندارىن ايتتى.

وبلىس پروكۋراتۋراسى «زاڭ مەن ءتارتىپ» قاعيداتى اياسىندا مۇمكىندىگى شەكتەۋلى ازاماتتاردىڭ قۇقىقتارىن قورعاۋ باعىتىنداعى جۇمىسىن جالعاستىرۋدا. تۇركىستاندا مۇمكىندىگى شەكتەۋلى ازاماتتاردى جەكە قابىلداۋدىڭ باستى ماقسات – قۇقىقتىق ساۋاتتىلىقتى ارتتىرۋ جانە ازاماتتاردىڭ زاڭدى مۇددەلەرىن قورعاۋعا قولداۋ كورسەتۋ. مۇنداي كەزدەسۋلەر حالىق پەن بيلىك اراسىنداعى بايلانىستى نىعايتۋعا باعىتتالعان.

بۇگىندە وبلىس اۋماعىندا 101 557 مۇمكىندىگى شەكتەۋلى ازامات تىركەلگەن. پروكۋراتۋرا ورگاندارىنىڭ قاداعالاۋ جۇمىستارىنىڭ ناتيجەسىندە كوپتەگەن مۇگەدەك جاننىڭ قۇقىعى قورعالدى. ماسەلەن، «اۆتوموبيل كولىگى تۋرالى» زاڭ تالاپتارىنا سايكەس، ءبىرىنشى توپتاعى مۇگەدەكتەر مەن ءبىرقاتار الەۋمەتتىك توپ وكىلدەرى ءۇشىن قالالىق جانە قالا ماڭىنداعى كولىكپەن تەگىن نەمەسە جەڭىلدىكپەن ءجۇرۋ قۇقىعى قاراستىرىلعان. الايدا وبلىستىڭ كەيبىر ايماقتارىندا بۇل تالاپتاردىڭ ورىندالماۋى انىقتالعان. جەتىساي، ماقتاارال اۋداندارى مەن كەنتاۋ قالاسىندا جۇرگىزىلگەن تەكسەرىس ناتيجەسىندە 3263 مۇمكىندىگى شەكتەۋلى ازاماتتىڭ قۇقىعى قالپىنا كەلتىرىلدى.