Qazaqstan halqynyń 60 paiyzy KSRO taraǵannan keiin dúniege kelip, reseiliktermen bir memlekette ómir súrmegenine qaramastan, Reseige degen jyly qarym-qatynas saqtalyp otyr. Bul týraly Qazaqstannyń Reseidegi elshisi Dáýren Abaev reseilik "Argýmenty i fakty" basylymyna bergen suhbatynda aitty, dep habarlaidy Dalanews.kz.
Suhbat barysynda elshi qazaqstandyq jastardyń Resei týraly kózqarasyn aitqan.
"Bul suraqty maǵan reseilikter jii qoiady, tek jýrnalister ǵana emes, qarapaiym adamdar da. Negizinde, suraqtyń óz formýlirovkasynda bir alańdaýshylyq bar: "eger Qazaqstan qoǵamynda "táýelsizdik býyny" ústemdik etse, eki el arasyndaǵy bar tarihi bailanystar men dostyq qatynas joiylyp ketpei me?" degen qaýip jatyr", – dedi Dáýren Abaev.
Abaev Qazaqstanda 1991 jyldan keiin dúniege kelgen jáne KSRO kezinde reseiliktermen birge ómir súrmegen azamattardyń úlesi 60 paiyzǵa jýyqtap qalǵanyn atap ótti. Bul - óte úlken kórsetkish. Ásirese, bul sanatqa ekonomikalyq jáne azamattyq belsendiligi joǵary, qoǵamnyń áleýmettik-mádeni beinesin qalyptastyryp otyrǵan toptar jatady.
Alaida, elshi atap ótkendei, bul jaǵdai qazaqstandyqtardyń Reseige degen kózqarasyna keri áserin tigizip otyrǵan joq.
"Áleýmettik saýalnamalar muny anyq kórsetip otyr: Resei áli de eń dostas el retinde kósh bastap tur", – dedi ol.
Abaev bul qubylysty birneshe tarihi faktorlarmen bailanystyrdy.
"Urpaq aýyssa da, bizde ózgermeitin qundylyqtar bar – bul tatý kórshilik dástúri, ózara kómektesý, tarihi synaqtardy birge eńserý tájiribesi. Bizde álemdegi eń uzyn ortaq shekara bar. Ortaq ekonomikalyq, gýmanitarlyq, saiasi jobalarymyz jeterlik. Bizdi mádeni bailanys qana emes, tipti tereń mentaldyq uqsastyq ta bailanystyrady", – dedi elshi.
"Eger bir ret Qazaqstanǵa kelip kórsek, onda milliondaǵan jas qazaqstandyqtyń qazaq jáne orys tilinde erkin sóileitinin, reseilik án tyńdap, reseilik film kóretinin, Ostrovskii men Chehovtyń pesalaryn sahnadan tamashalaitynyn baiqaisyzdar", – dedi Abaev.
Sondai-aq ol keibir azamattardyń eki eldiń saiasi baǵytyna kóńili tolmaitynyn joqqa shyǵarmady.
"Iá, eki elde de saiasi baǵyttarǵa kóńili tolmaityndar tabylady. Bul – qalypty qubylys. Sebebi ártúrli pikir bar, ol bizdiń qoǵamdardyń kúrdeliligi men bailyǵyn kórsetedi. Biraq negizgi qoǵamdyq ózek, iaǵni qazaqstandyq ta, reseilik te qoǵamdar eki el arasyndaǵy tyǵyz dostyqty qoldaidy. Bul saiasi deńgeide de kórinis taýyp otyr. Prezidentterimiz Qasym-Jomart Toqaev pen Vladimir Pýtin jáne, árine, úkimetterimiz bul baǵytta júieli jumys júrgizýde", – dedi Dáýren Abaev.
