AQSh-tyń iri munai kompaniialary birneshe ai boiy Ormýz buǵazynyń uzaq ýaqytqa jabylýy álemdik janarmai daǵdarysyna ákeletinin eskertip kelgen edi. Endi olardyń aitýynsha, bul qaýip shyndyqqa ainala bastady, dep habarlaidy dalanews.kz.
The Wall Street Journal basylymynyń jazýynsha, álemdegi kommertsiialyq janarmai qory alty aidan astam ýaqyt boiy azaiyp keledi. Al munaidyń strategiialyq qorlaryn paidalaný múmkindigi de shektelgen.
Jaǵdaidy ýshyqtyrǵan taǵy bir faktor – ótken aptada Saýd Arabiiasynda Ormýz buǵazyn ainalyp ótetin mańyzdy munai qubyrynyń jumysy toqtatylǵany. Sarapshylardyń baǵalaýynsha, sonyń saldarynan álemdik naryqqa táýligine keminde 2,5 million barrel munaidyń jetkizilýi kesheýildep otyr.
Chevron kompaniiasynyń bas direktory Maik Ýort buǵan deiin naryqtaǵy baǵa men jetkizilim táýekelderin azaitýǵa múmkindik bergen tetikterdiń búginde sarqylǵanyn málimdedi.
Basylymnyń dereginshe, Ekonomikalyq yntymaqtastyq jáne damý uiymyna (EYDU) múshe elder kóktemde strategiialyq qorlardan 400 million barrel munai alýǵa sheshim qabyldaǵan. Sondyqtan qosymsha rezervterdi paidalaný múmkindigi aitarlyqtai azaiǵan.
Sonymen qatar sońǵy ailarda munai importyn qysqartyp, ishki qorlaryna súienip kelgen Qytai halyqaralyq jetkizýshilerden munai satyp alýdy qaita ulǵaita bastaǵan. Bul álemdik naryqtaǵy suranysty arttyryp, munai jetkizilimine qatysty qysymdy kúsheitýi múmkin.
Sarapshylardyń pikirinshe, kommertsiialyq qorlardyń azaiýy men jetkizilimdegi irkilister jahandyq energetika naryǵyndaǵy táýekelderdi kúsheitip otyr.
