Qazaqstannyń Dúniejúzilik saýda uiymy aiasyndaǵy qyzmet kórsetý salasyna qatysty mindettemelerin jańartatyn zań jobasy Quryltai otyrysynda qaraldy, dep habarlaidy Dala News.
Depýtat D.K. Raihanova zań jobasy Qazaqstannyń DSU-nyń qyzmetter boiynsha ishki retteý qaǵidalaryna qosylýyn kózdeitinin aitty. Tiisti ózgerister 2021 jylǵy 2 jeltoqsanda Jenevada qabyldanǵan.
Onyń aitýynsha, Qazaqstannyń qyzmetterdi ishki retteý qaǵidalaryna qosylýy saýda-ekonomikalyq integratsiiany damytý jáne eldiń jahandyq saýda júiesindegi ustanymyn nyǵaitý baǵytyndaǵy kezekti qadam bolmaq.
Bul qaǵidalar qyzmet kórsetý salasyndaǵy litsenziialaý men biliktilik talaptaryna, sondai-aq olardy qoldaný rásimderine qoiylatyn talaptardy naqtylaýǵa baǵyttalǵan. DSU materialdarynda da Qazaqstannyń osy baǵyttaǵy jańa tártipterdi ázirleýge belsendi qatysqany jáne olardyń litsenziialaý, biliktilik pen tehnikalyq standarttarǵa bailanysty saýdaǵa shekteýshi áserdi azaitýǵa baǵyttalǵany kórsetilgen.
Qazaqstan atalǵan qaǵidalardy ázirleýge qatysqan elderdiń biri. Olardy iske asyrý qyzmet kórsetý salasyndaǵy ákimshilik rásimderdi jeńildetip, retteýdiń ashyqtyǵyn arttyrýǵa jáne naryq qatysýshylary úshin túsinikti talaptar qalyptastyrýǵa múmkindik beredi.
Qaǵidalar birneshe negizgi baǵytty qamtidy. Birinshiden, litsenziialaý rásimderi ashyq ári negizdi bolýy tiis. Ekinshiden, ótinishterdi qaraý merzimderi naqty belgilenip, qabyldanǵan sheshimder negizdelýi qajet. Úshinshiden, elektrondyq servisterdi paidalaný keńeitiledi. Tórtinshiden, qyzmet kórsetýshilerge qoiylatyn biliktilik talaptary túsinikti ári kemsitýsiz bolýy tiis.
Sonymen qatar bul qaǵidalar memlekettiń qyzmet kórsetý salasyn retteý ókilettigin shektemeidi. Olar belgilengen talaptardy ashyq jáne kemsitýsiz qoldanýdy kózdeidi.
Raihanovanyń aitýynsha, jańa talaptardyń engizilýi investitsiia tartýǵa, qazaqstandyq qyzmetterdiń eksportyn ulǵaitýǵa jáne eldiń halyqaralyq naryqtaǵy pozitsiiasyn nyǵaitýǵa yqpal etýi múmkin.
DSU talaptaryna sáikes, halyqaralyq kelisimder men Qazaqstannyń uiymǵa qosylý hattamasy ratifikatsiialanǵannan keiin eldiń ishki zańnamasynyń bir bóligine ainalady.
Ekonomikalyq saiasat, ónerkásip jáne energetika komiteti zań jobasyn birinshi oqylymda maquldaýdy usyndy.
