قازاقستان حالقىنىڭ 60 پايىزى كسرو تاراعاننان كەيىن دۇنيەگە كەلىپ، رەسەيلىكتەرمەن ءبىر مەملەكەتتە ءومىر سۇرمەگەنىنە قاراماستان، رەسەيگە دەگەن جىلى قارىم-قاتىناس ساقتالىپ وتىر. بۇل تۋرالى قازاقستاننىڭ رەسەيدەگى ەلشىسى داۋرەن ابايەۆ رەسەيلىك "ارگۋمەنتى ي فاكتى" باسىلىمىنا بەرگەن سۇحباتىندا ايتتى، دەپ حابارلايدى Dalanews.kz.
سۇحبات بارىسىندا ەلشى قازاقستاندىق جاستاردىڭ رەسەي تۋرالى كوزقاراسىن ايتقان.
"بۇل سۇراقتى ماعان رەسەيلىكتەر ءجيى قويادى، تەك جۋرناليستەر عانا ەمەس، قاراپايىم ادامدار دا. نەگىزىندە، سۇراقتىڭ ءوز فورمۋليروۆكاسىندا ءبىر الاڭداۋشىلىق بار: "ەگەر قازاقستان قوعامىندا "تاۋەلسىزدىك بۋىنى" ۇستەمدىك ەتسە، ەكى ەل اراسىنداعى بار تاريحي بايلانىستار مەن دوستىق قاتىناس جويىلىپ كەتپەي مە؟" دەگەن ءقاۋىپ جاتىر"، – دەدى داۋرەن ابايەۆ.
ابايەۆ قازاقستاندا 1991 جىلدان كەيىن دۇنيەگە كەلگەن جانە كسرو كەزىندە رەسەيلىكتەرمەن بىرگە ءومىر سۇرمەگەن ازاماتتاردىڭ ۇلەسى 60 پايىزعا جۋىقتاپ قالعانىن اتاپ ءوتتى. بۇل - وتە ۇلكەن كورسەتكىش. اسىرەسە، بۇل ساناتقا ەكونوميكالىق جانە ازاماتتىق بەلسەندىلىگى جوعارى، قوعامنىڭ الەۋمەتتىك-مادەني بەينەسىن قالىپتاستىرىپ وتىرعان توپتار جاتادى.
الايدا، ەلشى اتاپ وتكەندەي، بۇل جاعداي قازاقستاندىقتاردىڭ رەسەيگە دەگەن كوزقاراسىنا كەرى اسەرىن تيگىزىپ وتىرعان جوق.
"الەۋمەتتىك ساۋالنامالار مۇنى انىق كورسەتىپ وتىر: رەسەي ءالى دە ەڭ دوستاس ەل رەتىندە كوش باستاپ تۇر"، – دەدى ول.
ابايەۆ بۇل قۇبىلىستى بىرنەشە تاريحي فاكتورلارمەن بايلانىستىردى.
"ۇرپاق اۋىسسا دا، بىزدە وزگەرمەيتىن قۇندىلىقتار بار – بۇل تاتۋ كورشىلىك ءداستۇرى، ءوزارا كومەكتەسۋ، تاريحي سىناقتاردى بىرگە ەڭسەرۋ تاجىريبەسى. بىزدە الەمدەگى ەڭ ۇزىن ورتاق شەكارا بار. ورتاق ەكونوميكالىق، گۋمانيتارلىق، ساياسي جوبالارىمىز جەتەرلىك. ءبىزدى مادەني بايلانىس قانا ەمەس، ءتىپتى تەرەڭ مەنتالدىق ۇقساستىق تا بايلانىستىرادى"، – دەدى ەلشى.
"ەگەر ءبىر رەت قازاقستانعا كەلىپ كورسەك، وندا ميلليونداعان جاس قازاقستاندىقتىڭ قازاق جانە ورىس تىلىندە ەركىن سويلەيتىنىن، رەسەيلىك ءان تىڭداپ، رەسەيلىك فيلم كورەتىنىن، وستروۆسكيي مەن چەحوۆتىڭ پەسالارىن ساحنادان تاماشالايتىنىن بايقايسىزدار"، – دەدى ابايەۆ.
سونداي-اق ول كەيبىر ازاماتتاردىڭ ەكى ەلدىڭ ساياسي باعىتىنا كوڭىلى تولمايتىنىن جوققا شىعارمادى.
"ءيا، ەكى ەلدە دە ساياسي باعىتتارعا كوڭىلى تولمايتىندار تابىلادى. بۇل – قالىپتى قۇبىلىس. سەبەبى ءارتۇرلى پىكىر بار، ول ءبىزدىڭ قوعامداردىڭ كۇردەلىلىگى مەن بايلىعىن كورسەتەدى. ءبىراق نەگىزگى قوعامدىق وزەك، ياعني قازاقستاندىق تا، رەسەيلىك تە قوعامدار ەكى ەل اراسىنداعى تىعىز دوستىقتى قولدايدى. بۇل ساياسي دەڭگەيدە دە كورىنىس تاۋىپ وتىر. پرەزيدەنتتەرىمىز قاسىم-جومارت توقايەۆ پەن ۆلاديمير پۋتين جانە، ارينە، ۇكىمەتتەرىمىز بۇل باعىتتا جۇيەلى جۇمىس جۇرگىزۋدە"، – دەدى داۋرەن ابايەۆ.
