Jetisý oblysy, Alakól aýdanynyń ákimi Almas Ábdinov Alakólde demalý baǵasyna qatysty áleýmettik jelilerde aitylyp júrgen pikirlerge túsinikteme berdi. Keibir qazaqstandyqtar Alakóldegi demalys baǵasy sheteldegi tanymal kýrorttardan, tipti Mysyrdan da qymbat ekenin aityp, narazylyq bildirgen bolatyn,- dep habarlaidy Dalanews.kz
Baspasóz jiynynda jýrnalister ákimnen: "Nelikten keibir jeli qoldanýshylary Alakólde demalý Mysyrǵa barǵannan da qymbat dep sanaidy?" – degen suraq qoidy.
— Bul – naryq. Bireý Mysyrǵa barady, bul – onyń tańdaýy. Men Alakólde demalý qymbat dep aitpas edim. Munyń bári qyzmet kórsetý sapasy men týristiń talǵamyna bailanysty. Iá, bizde baǵasy joǵary demalys oryndary bar, sebebi olar joǵary deńgeide qyzmet kórsetedi. Biraq arzandaý nusqalar da bar – kúnine 17-20 myń teńgege úsh mezgil tamaqpen. Al eń qymbat bólmeler 100 myń teńgeden asady, tipti 300 myń teńgege deiin baratyn oryndar da bar. Bul árkimniń tańdaýyna bailanysty. Jalpy el boiynsha belgili bir baǵa saiasatyn nemese normativterdi ázirleý qajet shyǵar. Qarap otyrsaq, tipti qymbat qonaq úilerde de bos oryn joq, – dedi Almas Ábdinov.
Sonymen qatar, ákim qonaqtar tarapynan jii aitylatyn Ýsharal áýejaiy men temirjol vokzalynan Aqshi men Kóktuma demalys aimaqtaryna deiingi taksi baǵasyna qatysty pikir bildirdi.
— Bul rasynda kúrdeli másele. Aqshi aýylynda turaqty avtobýs baǵytyn iske qosý úshin sýbsidiia bólinip, qazir konkýrs rásimderi ótip jatyr. Sonymen birge, kóptegen qymbat qonaq úiler men kýrorttyq keshender óz klientterine transferdi ózderi uiymdastyrady. Sondyqtan olardyń baǵasy da joǵary, – dedi ákim.
Ákim taksi júrgizýshileriniń áreketine bailanysty da pikir bildirdi.
— Men júrgizýshilermen de sóilestim. Olar ártúrli jaýap beredi. Men olarǵa "jol jaqsy, benzin qymbattap jatqan joq" desem, olar bári naryqqa tireletinin aitady. Keibir taksi júrgizýshilerinen "resmi tirkeldiń be" dep surasam, naqty jaýap berýden jaltarady. Bul máselege qatysty jumys istep jatyrmyz jáne baqylaýda ustap otyrmyz, – dedi ol.
