Almaty oblysynyń Jalpaqsai aýylynda itterdiń shabýylynan zardap shekken balanyń jaǵdaiyna qatysty dárigerler túsinikteme berdi, dep habarlaidy Dalanews.kz.
Oblystyq densaýlyq saqtaý basqarmasynyń málimetinshe, balanyń jaǵdaiy aýyr dep baǵalanyp otyr.
"1 shildede balanyń jaǵdaiy turaqtalǵan soń Qarasai aýdandyq ortalyq aýrýhanasynan oblystyq balalar klinikalyq aýrýhanasyna aýystyrylyp, jansaqtaý bólimine jatqyzyldy. Qazirgi jaǵdaiy turaqty aýyr", – dedi basqarmanyń baspasóz qyzmeti ókili.
Bala esin biledi. Qazirgi tańda onymen jáne anasymen klinikalyq psiholog jumys júrgizip jatyr.
Dárigerler jaraqattyń naqty sipatyn ashyp aitpaǵanymen, áleýmettik jelilerde taraǵan aqparattarǵa sáikes, balanyń beti, kózi men jambasy qatty zaqymdanǵan. Jergilikti turǵyndar itter onyń qulaǵyn da julyp alǵanyn aitady. Aldaǵy ýaqytta balaǵa birneshe qalpyna keltirý otasy men uzaq ońaltý kezeńi qajet bolýy múmkin.
Eske salaiyq, Almaty oblysynyń Qarasai aýdanyna qarasty aýylda 10 jastaǵy balany eki qabaǵan it talap, aýyr jaraqattady. Oqiǵa 30 mamyrda bolǵan.
Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizý úshin bara jatqanda, bir top balanyń shýlap, jan-jaqqa qasha jónelgenin kórgen.
Qazir 10 jastaǵy bala Qarasai aýdandyq ortalyq aýrýhanasynda aýyr jaraqatpen em alyp jatyr.
Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
