الماتى وبلىسىنىڭ جالپاقساي اۋىلىندا يتتەردىڭ شابۋىلىنان زارداپ شەككەن بالانىڭ جاعدايىنا قاتىستى دارىگەرلەر تۇسىنىكتەمە بەردى، دەپ حابارلايدى Dalanews.kz.
وبلىستىق دەنساۋلىق ساقتاۋ باسقارماسىنىڭ مالىمەتىنشە، بالانىڭ جاعدايى اۋىر دەپ باعالانىپ وتىر.
"1 شىلدەدە بالانىڭ جاعدايى تۇراقتالعان سوڭ قاراساي اۋداندىق ورتالىق اۋرۋحاناسىنان وبلىستىق بالالار كلينيكالىق اۋرۋحاناسىنا اۋىستىرىلىپ، جانساقتاۋ بولىمىنە جاتقىزىلدى. قازىرگى جاعدايى تۇراقتى اۋىر"، – دەدى باسقارمانىڭ باسپا ءسوز قىزمەتى وكىلى.
بالا ەسىن بىلەدى. قازىرگى تاڭدا ونىمەن جانە اناسىمەن كلينيكالىق پسيحولوگ جۇمىس جۇرگىزىپ جاتىر.
دارىگەرلەر جاراقاتتىڭ ناقتى سيپاتىن اشىپ ايتپاعانىمەن، الەۋمەتتىك جەلىلەردە تاراعان اقپاراتتارعا سايكەس، بالانىڭ بەتى، كوزى مەن جامباسى قاتتى زاقىمدانعان. جەرگىلىكتى تۇرعىندار يتتەر ونىڭ قۇلاعىن دا جۇلىپ العانىن ايتادى. الداعى ۋاقىتتا بالاعا بىرنەشە قالپىنا كەلتىرۋ وتاسى مەن ۇزاق وڭالتۋ كەزەڭى قاجەت بولۋى مۇمكىن.
ەسكە سالايىق، الماتى وبلىسىنىڭ قاراساي اۋدانىنا قاراستى اۋىلدا 10 جاستاعى بالانى ەكى قاباعان يت تالاپ، اۋىر جاراقاتتادى. وقيعا 30 مامىردا بولعان.
وقيعانىڭ باستى كۋاگەرى ءارى بالانى قۇتقارىپ قالعان اۋىل تۇرعىنى، زەينەتكەر سەرىكبەك ساقايبەكوۆتىڭ ايتۋىنشا، سول كۇنى كولىگىمەن جولاۋشى ايەلدى ۇيىنە جەتكىزۋ ءۇشىن بارا جاتقاندا، ءبىر توپ بالانىڭ شۋلاپ، جان-جاققا قاشا جونەلگەنىن كورگەن.
ءقازىر 10 جاستاعى بالا قاراساي اۋداندىق ورتالىق اۋرۋحاناسىندا اۋىر جاراقاتپەن ەم الىپ جاتىر.
بالانىڭ اناسى ەكاتەرينا بۋرميستروۆانىڭ ايتۋىنشا، ۇلىنىڭ جاعدايى وتە قيىن.
