Soltústik Qazaqstan oblysy Taiynsha aýdany ákimdiginiń burynǵy sheneýnigi Dmitrii Rýdenko biýdjet qarjysyn jymqyrǵany úshin segiz jylǵa sottaldy. Bir qyzyǵy, bul onyń keiingi bir jyl ishindegi ekinshi sot úkimi, dep habarlaidy Dalanews.kz.
Taiynsha aýdandyq ákimdiginiń sáýlet, qurylys, turǵyn úi-kommýnaldyq sharýashylyq, jolaýshylar kóligi jáne avtomobil joldary bólimin basqarǵan Rýdenko osyǵan deiin de para alǵany úshin jeti jylǵa sottalǵan. Onymen birge aýdan ákiminiń burynǵy orynbasary Erkebulan Dúisembin men kásipker Vage Akopian da jaza arqalaǵan edi. Biraq, birinshi sottyń siiasy keppei jatyp, ekinshi isi bastaldy.
Bul joly Rýdenko 189-bap (senip tapsyrylǵan bóten múlikti asa iri kólemde iemdený jáne talan-tarajǵa salý) boiynsha jaýapqa tartyldy.
Oqiǵa bylai bolǵan: 2023 jyly kúzde Taiynsha qalasyndaǵy dene shynyqtyrý-saýyqtyrý kesheni, muz aidyny men politsiia pýnktin ortalyq jylý júiesine qosý úshin jylý qubyryn salý kerek bolady. Jumys quny 4 million teńge dep esepteledi.
Qyzyǵy da osynda bastalǵan: aýdandaǵy qurylys bóliminiń basshysy Rýdenko bul qarajatty biýdjetten bólýge múmkindik baryn kórip, basqa kompaniiaǵa («StroiSmetaKZ» JShS) habarlasady. Olar qurylys shyǵyndaryn montaj jumystarymen birge 24 million teńgege baǵalap beredi.
Aiyptaý qorytyndysyna sáikes, osy kezde Rýdenko memleket qarjysyn zańsyz iemdenýdi josparlaidy. Ol aýdandyq kásipkerlik sýbektisi «Rassvet» jeke kásipkerligimen jalǵan kelisimshart jasasyp, biýdjet aqshasyn sol arqyly qolma-qol aqshaǵa ainaldyrmaq bolǵan.
Sóitip, aýdan ákimdigi men kásipker arasyndaǵy kelisim boiynsha 24 million teńgeniń 4 milliony naqty jumys istegen «TaiynshaKommýnServis» seriktestigine aýdarylyp, qalǵan 20 million teńgeni Rýdenko óz qajetine jaratqan.
Sot otyrysynda sheneýnik ózine taǵylǵan aiypty moiyndamady. Aitýynsha, ol áleýmettik mańyzy bar nysandardy aiazdan qorǵaý úshin áreket etken jáne tipti jobalyq-smetalyq qujattamany ázirleýge 40 myń teńgeni qaltasynan shyǵarǵan. Onyń sózine sensek, qalǵan qarajat qosymsha jumystarǵa jumsalǵan.
Biraq aýdandyq sot bul ýájdi negizsiz dep tapty. Rýdenkony 8 jylǵa bas bostandyǵynan aiyrý týraly úkim shyqty. Buǵan deiin Petropavl qalalyq sotynyń 7 jylǵa bas bostandyǵynan aiyrý úkimi bolǵanymen, zań boiynsha qatańdaý jaza ǵana qoldanylady. Osylaisha ol segiz jylǵa sottaldy. Budan bólek, Rýdenko ómir boiyna memlekettik qyzmette jáne kvazimemlekettik sektorda qyzmet etý quqyǵynan aiyryldy.
Sondai-aq sot úkimimen ol Taiynsha aýdany ákimdigine keltirilgen 16 million teńgege jýyq qarajatty tolyq óteýge mindetteldi.
