Búgin Qyzylorda oblysynyń ákimi Nurlybek Nálibaev áleýmettik osal top sanatyndaǵy otbasylarǵa sol jaǵalaýdan salynǵan 60 páterlik turǵyn úidiń kiltin tabystady,- dep habarlaidy Dalanews.kz
Saltanatty rásimge Parlament Senaty men Májilisiniń depýtattary Naýryzbai Baiqadamov, Murat Ábenov, Marhabat Jaiymbetov, oblystyq máslihat tóraǵasy Murat Tileýmbetov, quqyq qorǵaý organdarynyń basshylary, ziialy qaýym ókilderi men qala turǵyndary qatysty.
Aimaq basshysy jańa qonys ielerin quttyqtap, óńirdegi aýqymdy jobalarǵa toqtaldy.
«Memleket basshymyz Qasym-Jomart Kemeluly halyqty turǵyn úimen qamtamasyz etý memlekettiń áleýmettik saiasatynyń basym baǵyty ekenin atap ótti. Bul maqsatta aýqymdy jumys atqarylýda. Sońǵy úsh jylda oblysymyzda qarjylandyrýdyń barlyq kózinen 2 mln. 500 myń sharshy metr turǵyn úi paidalanýǵa berildi. Kezekte turǵan halyqtyń áleýmettik osal toptaryna 4 myńǵa jýyq páter, jalǵyz baspanasy apatty dep tanylǵan azamattarǵa páterler satyp alynyp, 9 myńǵa jýyq otbasy úili boldy.
Biyl ultymyzdyń tarihi «Qazaq» ataýynyń qaitarylǵanynyń, Qyzylordanyń Qazaq eliniń astanasy bolǵanynyń 100 jyldyǵy keń kólemde atalyp ótýde. Mereili jyl aiasynda sáýleti kelisken ásem de zamanýi ǵimarattar boi kóterip, el igiligine ainalýda. Biýdjetten turǵyn úi qurylysy men jeke salýshylardan daiyn páterler satyp alýǵa 50 mlrd. teńge bólinip, 2 765 páter tabystalady. Búgin osy jumystardyń nátijesi men qýanyshty sátine ózderińizben birge jetýdemiz. Bul – memlekettiń qoldaýyn sezinip, baspanaly bolýǵa niet etken árbir otbasy úshin erekshe kún! Baspanaly bolý ata-anany da, balalardy da jaqsylyqqa jeteleidi. Jańa qonystaryńyz tatýlyq pen berekeniń ordasyna ainalsyn!», – dedi Nurlybek Mashbekuly.
Rásimde merdiger mekeme qyzmetkerlerine oblys ákiminiń Alǵys haty tabystaldy. Senat depýtaty Naýryzbai Seitqaliuly, Májilis depýtaty Murat Abdýlamituly quttyqtaý sóz sóiledi.
Aita ketý kerek, oblysta Memleket basshysynyń tikelei qoldaýymen aýqymdy jobalar júzege asyrylýda. Qyzylorda qalasynda 215 mlrd teńgege qýattylyǵy 240 MVt jańa jylý-elektr ortalyǵy salynýda. Prezidenttiń Katar eline jumys sapary aiasyndaǵy úkimetaralyq kelisimge sáikes, qýattylyǵy 1100 MVt, quny 892 mlrd teńge bolatyn bý-gaz qondyrǵysyn salý kelisildi. Bul megajoba 2028 jyly tolyǵymen iske qosylady.
Búginde Qyzylorda qalasynyń kópqabatty turǵyn úilerine ystyq sý qosylýda. Aldaǵy jylý berý maýsymynda páterler ystyq sýmen qamtamasyz etilip, jyl sońyna deiin gazdandyrý deńgeii 83 paiyzǵa jetkiziledi.
2023-2025 jyldary 1 232 shaqyrym avtomobil joldary men kóshelerdi, 18 kópir ótkelin salýǵa, kúrdeli jóndeýge 121 mlrd. 500 mln. teńge bólinip, jaqsy jaǵdaidaǵy joldardyń úlesi 92 paiyz boldy. Biyl 329 shaqyrym jol jóndelip, jaqsy jaǵdaidaǵy joldardyń úlesi 95 paiyzǵa jetedi.
