بۇگىن قىزىلوردا وبلىسىنىڭ اكىمى نۇرلىبەك نالىبايەۆ الەۋمەتتىك وسال توپ ساناتىنداعى وتباسىلارعا سول جاعالاۋدان سالىنعان 60 پاتەرلىك تۇرعىن ءۇيدىڭ كىلتىن تابىستادى،- دەپ حابارلايدى Dalanews.kz
سالتاناتتى راسىمگە پارلامەنت سەناتى مەن ءماجىلىسىنىڭ دەپۋتاتتارى ناۋرىزباي بايقاداموۆ، مۇرات ابەنوۆ، مارحابات جايىمبەتوۆ، وبلىستىق ءماسليحات ءتوراعاسى مۇرات تىلەۋمبەتوۆ، قۇقىق قورعاۋ ورگاندارىنىڭ باسشىلارى، زيالى قاۋىم وكىلدەرى مەن قالا تۇرعىندارى قاتىستى.
ايماق باسشىسى جاڭا قونىس يەلەرىن قۇتتىقتاپ، وڭىردەگى اۋقىمدى جوبالارعا توقتالدى.
«مەملەكەت باسشىمىز قاسىم-جومارت كەمەل ۇلى حالىقتى تۇرعىن ۇيمەن قامتاماسىز ەتۋ مەملەكەتتىڭ الەۋمەتتىك ساياساتىنىڭ باسىم باعىتى ەكەنىن اتاپ ءوتتى. بۇل ماقساتتا اۋقىمدى جۇمىس اتقارىلۋدا. سوڭعى ءۇش جىلدا وبلىسىمىزدا قارجىلاندىرۋدىڭ بارلىق كوزىنەن 2 ملن. 500 مىڭ شارشى مەتر تۇرعىن ءۇي پايدالانۋعا بەرىلدى. كەزەكتە تۇرعان حالىقتىڭ الەۋمەتتىك وسال توپتارىنا 4 مىڭعا جۋىق پاتەر، جالعىز باسپاناسى اپاتتى دەپ تانىلعان ازاماتتارعا پاتەرلەر ساتىپ الىنىپ، 9 مىڭعا جۋىق وتباسى ءۇيلى بولدى.
بيىل ۇلتىمىزدىڭ تاريحي «قازاق» اتاۋىنىڭ قايتارىلعانىنىڭ، قىزىلوردانىڭ قازاق ەلىنىڭ استاناسى بولعانىنىڭ 100 جىلدىعى كەڭ كولەمدە اتالىپ وتۋدە. مەرەيلى جىل اياسىندا ساۋلەتى كەلىسكەن اسەم دە زامانۋي عيماراتتار بوي كوتەرىپ، ەل يگىلىگىنە اينالۋدا. بيۋدجەتتەن تۇرعىن ءۇي قۇرىلىسى مەن جەكە سالۋشىلاردان دايىن پاتەرلەر ساتىپ الۋعا 50 ملرد. تەڭگە ءبولىنىپ، 2 765 پاتەر تابىستالادى. بۇگىن وسى جۇمىستاردىڭ ناتيجەسى مەن قۋانىشتى ساتىنە وزدەرىڭىزبەن بىرگە جەتۋدەمىز. بۇل – مەملەكەتتىڭ قولداۋىن سەزىنىپ، باسپانالى بولۋعا نيەت ەتكەن ءاربىر وتباسى ءۇشىن ەرەكشە كۇن! باسپانالى بولۋ اتا-انانى دا، بالالاردى دا جاقسىلىققا جەتەلەيدى. جاڭا قونىستارىڭىز تاتۋلىق پەن بەرەكەنىڭ ورداسىنا اينالسىن!»، – دەدى نۇرلىبەك ماشبەك ۇلى.
راسىمدە مەردىگەر مەكەمە قىزمەتكەرلەرىنە وبلىس اكىمىنىڭ العىس حاتى تابىستالدى. سەنات دەپۋتاتى ناۋرىزباي سەيتقالي ۇلى، ءماجىلىس دەپۋتاتى مۇرات ابدۋلاميت ۇلى قۇتتىقتاۋ ءسوز سويلەدى.
ايتا كەتۋ كەرەك، وبلىستا مەملەكەت باسشىسىنىڭ تىكەلەي قولداۋىمەن اۋقىمدى جوبالار جۇزەگە اسىرىلۋدا. قىزىلوردا قالاسىندا 215 ملرد تەڭگەگە قۋاتتىلىعى 240 مۆت جاڭا جىلۋ-ەلەكتر ورتالىعى سالىنۋدا. پرەزيدەنتتىڭ كاتار ەلىنە جۇمىس ساپارى اياسىنداعى ۇكىمەتارالىق كەلىسىمگە سايكەس، قۋاتتىلىعى 1100 مۆت، قۇنى 892 ملرد تەڭگە بولاتىن بۋ-گاز قوندىرعىسىن سالۋ كەلىسىلدى. بۇل مەگاجوبا 2028 جىلى تولىعىمەن ىسكە قوسىلادى.
بۇگىندە قىزىلوردا قالاسىنىڭ كوپقاباتتى تۇرعىن ۇيلەرىنە ىستىق سۋ قوسىلۋدا. الداعى جىلۋ بەرۋ ماۋسىمىندا پاتەرلەر ىستىق سۋمەن قامتاماسىز ەتىلىپ، جىل سوڭىنا دەيىن گازداندىرۋ دەڭگەيى 83 پايىزعا جەتكىزىلەدى.
2023-2025 جىلدارى 1 232 شاقىرىم اۆتوموبيل جولدارى مەن كوشەلەردى، 18 كوپىر وتكەلىن سالۋعا، كۇردەلى جوندەۋگە 121 ملرد. 500 ملن. تەڭگە ءبولىنىپ، جاقسى جاعدايداعى جولداردىڭ ۇلەسى 92 پايىز بولدى. بيىل 329 شاقىرىم جول جوندەلىپ، جاقسى جاعدايداعى جولداردىڭ ۇلەسى 95 پايىزعا جەتەدى.
