الماتىدا تانىمال ءانشى گۇلنار سيقىمبايەۆانىڭ جالعىز ۇلى باير سيقىمبايەۆ حابار-وشارسىز جوعالىپ كەتتى. بۇل تۋرالى ونىڭ جارى ۇلجان شارىپبەكوۆا مالىمدەدى، دەپ حابارلايدى Dalanews.kz.

ۇلجان شارىپبەكوۆا "بارمىسىڭ، باۋىرىم؟" راديوباعدارلاماسىندا كۇيەۋىن ىزدەستىرىپ جاتقانىن جەتكىزدى. ونىڭ سوزىنشە، باير سيقىمبايەۆ 24 ناۋرىزدا شامامەن ساعات 13:00-دە ۇيدەن شىعىپ كەتىپ، سودان بەرى قايتا ورالماعان. كەيىن ونى ىزدەۋ باستالىپ، پوليسياعا دا رەسمي تۇردە حابار بەرىلگەن. الايدا ازىرگە ناقتى مالىمەت جوق.

"سوڭعى كەزدە اتا-اناسىنان قالعان ءۇيدى ساتىپ، باسقا جاققا كوشكىم كەلەدى دەپ ايتاتىن. ادام بولعان سوڭ نەشە ءتۇرلى وي كەلەدى. ۇيگە قاتىستى بولۋى مۇمكىن بە دەپ تە ويلايمىن. قازىرگى زاماندا الاياق كوپ. بولماسا ءبىر جەردە بىرەۋ ۇستاپ، قيناپ وتىر ما، نە ويلارىمدى بىلمەيمىن"، - دەدى ول.

ۇلجان شارىپبەكوۆا جولداسىن كورگەن-بىلگەن جانداردان وزىنە نەمەسە پوليسياعا حابارلاسۋدى سۇرادى.