الماتىداعى ءال-فارابي داڭعىلىندا بولعان جول اپاتىنا قاتىستى ىشكى ىستەر ءمينيسترى ەرجان سادەنوۆ ماڭىزدى مالىمدەمە جاسادى، دەپ حابارلايدى Dalanews.kz.
ءمينيستردىڭ ايتۋىنشا، مەملەكەت باسشىسىنىڭ 2026 جىلعى 30 ناۋرىزدا قاۋىپسىزدىك كەڭەسىنىڭ وتىرىسىندا بەرگەن تاپسىرماسىنا سايكەس ءىىم الماتى قالاسىنداعى جول اپاتىنىڭ ءمان-جايىن جان-جاقتى ءارى وبەكتيۆتى تەرگەپ-تەكسەرۋ، كىنالىلەر جازادان جالتارماۋىن قامتاماسىز ەتۋ بويىنشا شارالار قابىلداپ جاتىر.
"جول اپاتىنا قاتىستى قىلمىستىق ءىس قوزعالدى. ZEEKR جۇرگىزۋشىسىن سوت شەشىمىمەن قاماۋعا الۋ شاراسى قابىلداندى. ول اپات كەزىندە الكوگولدىك ماساڭ كۇيدە بولعان. سونىمەن قاتار، بۇرىنعى پوليسيا قىزمەتكەرىنىڭ ارەكەتسىزدىگى جانە مەملەكەتتىك نومىرلىك بەلگىلەردىڭ زاڭسىز بەرىلۋى بويىنشا دا قىلمىستىق ىستەر قوزعالدى. تەرگەۋدى ءىىم-نىڭ وزىندىك قاۋىپسىزدىك دەپارتامەنتى جۇرگىزىپ جاتىر. قوعامدا تارالعان بارلىق مالىمەت تەكسەرىلىپ جاتىر"، - دەدى شەنەۋنىك.
جاعدايعا وبەكتيۆتى باعا بەرۋ ءۇشىن الماتى قالاسىنا ءىىم كوميسسياسى - وزىندىك قاۋىپسىزدىك دەپارتامەنتى، اكىمشىلىك پوليسيا كوميتەتى جانە جەكە قۇراممەن جۇمىس جونىندەگى دەپارتامەنت جىبەرىلگەن.
"قىزمەتتە جىبەرىلگەن كەمشىلىكتەر ءۇشىن الماتى قالالىق پوليسيا دەپارتامەنتى باستىعىنىڭ ورىنباسارى، سونداي-اق، اكىمشىلىك پوليسيا جانە قوعامدىق قاۋىپسىزدىك باسقارمالارىنىڭ باسشىلارى قىزمەتىنەن بوساتىلدى. ءقازىر قىزمەتتىك ءتارتىپتى كۇشەيتۋ جانە زاڭدىلىقتى قامتاماسىز ەتۋ بويىنشا قوسىمشا شارالار قابىلدانىپ جاتىر"، - دەدى ول.
قالاعا باسقا وڭىرلەردەن پوليسيا جاساقتارى جىبەرىلگەن. كەڭ اۋقىمدى تەكسەرىس جانە رەيدتىك ءىس-شارالار جۇرگىزىلىپ جاتىر. العاشقى كۇندەردىڭ وزىندە 4،8 مىڭنان اسا جول ءجۇرىسى قاعيدالارىن بۇزۋ دەرەگىنىڭ جولى كەسىلگەن. ونىڭ ىشىندە ماس كۇيىندە كولىك باسقارۋ، قارسى جولاققا شىعۋ، جالعان ءنومىر قولدانۋ جانە جۇرگىزۋ قۇقىعىنسىز كولىك باسقارۋ دەرەكتەرى بار. 2 مىڭنان اسا كولىك ايىپپۇل تۇراعىنا قويىلدى.
"وسىنداي كۇشەيتىلگەن ءىس-شارالار بۇكىل ەل بويىنشا جۇرگىزىلىپ جاتىر. تەرگەۋ بارىسى مەنىڭ جەكە باقىلاۋىمدا. بارلىق كىنالى زاڭ تالاپتارىنا سايكەس جاۋاپكەرشىلىككە تارتىلادى. ەشكىم دە مارتەبەسىنە، لاۋازىمىنا جانە بايلانىستارىنا قاراماستان، جاۋاپكەرشىلىكتەن جالتارا المايدى. بارلىعى زاڭ الدىندا تەڭ"، - دەپ مالىمدەدى مينيستر.
ەسكە سالايىق، قايعىلى وقيعا 21 ناۋرىزدا الماتىدا ءال-فارابي داڭعىلىندا بولدى. جول اپاتى سالدارىنان ءۇش ادام كوز جۇمدى.
