Almatydaǵy ál-Farabi dańǵylynda bolǵan jol apatyna qatysty ishki ister ministri Erjan Sádenov mańyzdy málimdeme jasady, dep habarlaidy Dalanews.kz.
Ministrdiń aitýynsha, Memleket basshysynyń 2026 jylǵy 30 naýryzda Qaýipsizdik keńesiniń otyrysynda bergen tapsyrmasyna sáikes IIM Almaty qalasyndaǵy jol apatynyń mán-jaiyn jan-jaqty ári obektivti tergep-tekserý, kináliler jazadan jaltarmaýyn qamtamasyz etý boiynsha sharalar qabyldap jatyr.
"Jol apatyna qatysty qylmystyq is qozǵaldy. ZEEKR júrgizýshisin sot sheshimimen qamaýǵa alý sharasy qabyldandy. Ol apat kezinde alkogoldik masań kúide bolǵan. Sonymen qatar, burynǵy politsiia qyzmetkeriniń áreketsizdigi jáne memlekettik nómirlik belgilerdiń zańsyz berilýi boiynsha da qylmystyq ister qozǵaldy. Tergeýdi IIM-niń Ózindik qaýipsizdik departamenti júrgizip jatyr. Qoǵamda taralǵan barlyq málimet tekserilip jatyr", - dedi sheneýnik.
Jaǵdaiǵa obektivti baǵa berý úshin Almaty qalasyna IIM komissiiasy - Ózindik qaýipsizdik departamenti, Ákimshilik politsiia komiteti jáne Jeke qurammen jumys jónindegi departament jiberilgen.
"Qyzmette jiberilgen kemshilikter úshin Almaty qalalyq Politsiia departamenti bastyǵynyń orynbasary, sondai-aq, ákimshilik politsiia jáne qoǵamdyq qaýipsizdik basqarmalarynyń basshylary qyzmetinen bosatyldy. Qazir qyzmettik tártipti kúsheitý jáne zańdylyqty qamtamasyz etý boiynsha qosymsha sharalar qabyldanyp jatyr", - dedi ol.
Qalaǵa basqa óńirlerden politsiia jasaqtary jiberilgen. Keń aýqymdy tekseris jáne reidtik is-sharalar júrgizilip jatyr. Alǵashqy kúnderdiń ózinde 4,8 myńnan asa jol júrisi qaǵidalaryn buzý dereginiń joly kesilgen. Onyń ishinde mas kúiinde kólik basqarý, qarsy jolaqqa shyǵý, jalǵan nómir qoldaný jáne júrgizý quqyǵynsyz kólik basqarý derekteri bar. 2 myńnan asa kólik aiyppul turaǵyna qoiyldy.
"Osyndai kúsheitilgen is-sharalar búkil el boiynsha júrgizilip jatyr. Tergeý barysy meniń jeke baqylaýymda. Barlyq kináli zań talaptaryna sáikes jaýapkershilikke tartylady. Eshkim de mártebesine, laýazymyna jáne bailanystaryna qaramastan, jaýapkershilikten jaltara almaidy. Barlyǵy zań aldynda teń", - dep málimdedi ministr.
Eske salaiyq, qaiǵyly oqiǵa 21 naýryzda Almatyda ál-Farabi dańǵylynda boldy. Jol apaty saldarynan úsh adam kóz jumdy.
