Jetisý oblysy, Alakól aýdanynyń ákimi Almas Ábdınov Alakólde demalý baǵasyna qatysty áleýmettik jelilerde aıtylyp júrgen pikirlerge túsinikteme berdi. Keıbir qazaqstandyqtar Alakóldegi demalys baǵasy sheteldegi tanymal kýrorttardan, tipti Mysyrdan da qymbat ekenin aıtyp, narazylyq bildirgen bolatyn,- dep habarlaıdy Dalanews.kz
Baspasóz jıynynda jýrnalıser ákimnen: "Nelikten keıbir jeli qoldanýshylary Alakólde demalý Mysyrǵa barǵannan da qymbat dep sanaıdy?" – degen suraq qoıdy.
— Bul – naryq. Bireý Mysyrǵa barady, bul – onyń tańdaýy. Men Alakólde demalý qymbat dep aıtpas edim. Munyń bári qyzmet kórsetý sapasy men týrısiń talǵamyna baılanysty. Iá, bizde baǵasy joǵary demalys oryndary bar, sebebi olar joǵary deńgeıde qyzmet kórsetedi. Biraq arzandaý nusqalar da bar – kúnine 17-20 myń teńgege úsh mezgil tamaqpen. Al eń qymbat bólmeler 100 myń teńgeden asady, tipti 300 myń teńgege deıin baratyn oryndar da bar. Bul árkimniń tańdaýyna baılanysty. Jalpy el boıynsha belgili bir baǵa saıasatyn nemese normatıvterdi ázirleý qajet shyǵar. Qarap otyrsaq, tipti qymbat qonaq úılerde de bos oryn joq, – dedi Almas Ábdınov.
Sonymen qatar, ákim qonaqtar tarapynan jıi aıtylatyn Ýsharal áýejaıy men temirjol vokzalynan Aqshı men Kóktuma demalys aımaqtaryna deıingi taksı baǵasyna qatysty pikir bildirdi.
— Bul rasynda kúrdeli másele. Aqshı aýylynda turaqty avtobýs baǵytyn iske qosý úshin sýbsıdıa bólinip, qazir konkýrs rásimderi ótip jatyr. Sonymen birge, kóptegen qymbat qonaq úıler men kýrorttyq keshender óz klıentterine transferdi ózderi uıymdastyrady. Sondyqtan olardyń baǵasy da joǵary, – dedi ákim.
Ákim taksı júrgizýshileriniń áreketine baılanysty da pikir bildirdi.
— Men júrgizýshilermen de sóılestim. Olar ártúrli jaýap beredi. Men olarǵa "jol jaqsy, benzın qymbattap jatqan joq" desem, olar bári naryqqa tireletinin aıtady. Keıbir taksı júrgizýshilerinen "resmı tirkeldiń be" dep surasam, naqty jaýap berýden jaltarady. Bul máselege qatysty jumys istep jatyrmyz jáne baqylaýda ustap otyrmyz, – dedi ol.
