Túrkistan oblysy ákimi apparatynyń basshysy Erkebulan Daýylbaev Túrkistan qalasynda salynyp jatqan meditsinalyq nysandardyń qurylys alańynda bolyp, jumys barysyn baqylady. Merdigerlermen kezdesip, birqatar tapsyrma berdi, - dep habarlaidy Dalanews.kz
Aldymen apparat basshysyna oblys ortalyǵynda salynyp jatqan «Ana men bala» ortalyǵyndaǵy jumystar tanystyryldy. Birikken Arab Ámirlikteriniń «Abý-Dabi» qorynyń demeýshiligimen salynyp jatqan perzenthana – 80 tósek-oryndyq. «Túrkistan» korporativtik áleýmettik damý qorynyń tapsyrysymen qurylys jumystaryn «Eristail-Kazahstan» JShS júrgizip jatyr. Ortalyq 3,3 gektar aýmaqta ornalasady. Ǵimarat eki qabatty, jalpy aýdany – 17 288 sharshy metr. Qazirgi tańda jer qazý jumystary tolyq aiaqtalǵan. Irgetasyn quiý jáne qaita topyraqpen kómý jumystary júrgizilýde.
Osy kúni apparat basshysy Túrkistan qalasyndaǵy 1,56 gektar aýmaqta boi kóterip jatqan ońaltý ortalyǵynyń jumysymen tanysty. Nysannyń qurylysyn «YDA INSAAT SANAYI VE TICARET ANONIM SIRKETI» AQ júrgizýde. Tapsyrys berýshi – «TURKISTAN INTERNATIONAL AIRPORT» JShS. Ǵimarattyń jalpy alańy - 2 227,41 sharshy metr. Joba boiynsha ortalyq aýmaǵynda balalar alańshasy qarastyrylǵan. Ortalyq tolyq zamanaýi jabdyqtarmen jabdyqtalyp, ainalasy kógaldandyrylady.
Jumys barysyn pysyqtaǵan Erkebulan Daýylbaev jaýapty tulǵalar men merdigerlerge qurylys barysynda óńirde shyǵarylatyn materialdardy qoldanýdy, ǵimarat ishin otandyq ónimdermen jabdyqtaýdy tapsyrdy. Nysandy óndiristik kestede kórsetilgen merzimde tapsyrýdy mindettep, «saqaldy qurylysqa» jol joq ekenin basa aitty. Qurylys sapasy oblys ákimi Nuralhan Kósherovtiń qatań baqylaýynda ekenin jetkizip, oryn alǵan kemshilikterdi qalpyna keltirýge ýaqyt berdi.
