Qazaqstan bıligimen sottasqan Qashaǵan kenishindegi sheteldik ınvestorlar sotta jeńiske jetti. Bul arada 4 mıllıard dollardan astam aıyppulǵa qatysty daý týraly sóz bolyp otyr. Sot NCOC konsorsıýmy músheleriniń paıdasyna qaraı sheshim shyǵardy, dep habarlaıdy Dalanews.kz.
Qazaqstan bıligi Qashaǵan ınvestorlarynan ekologıalyq talapty buzǵany úshin 2,3 trıllıon teńge (aıyppul salynǵan kezdegi baǵammen 5,1 mlrd dollar, qazirgi baǵammen shamamen 4,2 mlrd dollar) óndirmek bolǵan. Aıyppul, negizinen, ken ornyndaǵy kúkirttiń normatıvten tys saqtalýyna qatysty. Alaıda ınvestorlar sot arqyly óz áreketiniń zańdylyǵyn dáleldep shyqty.
"Apelásıalyq sottyń sheshimin qoldaımyz. Sheshim NCOC kompanıasynyń kúkirtpen jumys isteýde Qazaqstan zańnamasyn qatań saqtaǵanyn, halyqaralyq talaptarǵa saı ári jaýapkershilikpen áreket etkenin rastaıdy", delingen konsorsıým málimdemesinde.
Jalpy quny 55 mıllıard dollarǵa baǵalanǵan Qashaǵan jobasynyń iske qosylýy birneshe jylǵa sozylyp, túrli kedergilerge tap bolǵan. Osy ýaqyt ishinde joba seriktesteri arasynda baǵa saıasaty men ekologıalyq mindettemeler boıynsha daýly máseleler týyndady, dep jazady Bloomberg.
Qazaqstan úkimeti kenishten túsetin kiristiń ádiletsiz bólinip jatqanyn málimdep, ınvestorlarǵa qatysty jalpy somasy 160 mıllıard dollardan asatyn talappen halyqaralyq arbıtrajǵa júgindi.
Ótken jyly NCOC quramyndaǵy negizgi kompanıalar Eni, Shell, ExxonMobil jáne TotalEnergies kúkirtke qatysty daýdy áleýmettik jobalar arqyly sheshýdi usynǵan. Olar eki jyl ishinde Qazaqstandaǵy áleýmettik jobalarǵa qosymsha 110 mln dollar ınvestısıa salýǵa daıyn ekenin jetkizgen edi.
Ázirge Qazaqstannyń Energetıka mınıstrligi ınvestorlardyń sottaǵy jeńisine qatysty pikir bildirgen joq.
Investorlar 2025 jyly naýryz aıynda Qazaqstan úkimetiniń kúkirtke baılanysty talabyn moıyndamaıtynyn aıtyp, Joǵarǵy sotqa júgingen edi. Sol kezde NCOC seriktesteri kúkirtten bólek, sýdy tazartý men zıandy shyǵaryndylarǵa baılanysty taǵylǵan aıypty da negizsiz dep tanyǵan bolatyn.
Sarapshylar Qazaqstannyń mundaı iri daýlarda jeńilis tabýy eldegi ınvestısıalyq klımatqa keri áser etýi múmkin ekenin aıtady.
