Almatyda WorldSkills Almaty-2025 kásibi sheberlik boiynsha X óńirlik chempionaty ótip jatyr. Oǵan qalanyń 200-den astam kolledj stýdenti qatysýda, dep habarlaidy Dalanews.kz
Biylǵy chempionat erekshe mánge ie, óitkeni ol Memleket basshysy jariialaǵan Jumysshy mamandyqtary jyly aiasynda uiymdastyrylyp otyr. Bul bastama tehnikalyq jáne kásiptik bilimniń bedelin arttyrýǵa, sondai-aq jastar arasynda jumysshy mamandyqtardy tanymal etýge baǵyttalǵan.
Almatyda WorldSkills qozǵalysyna belsendi qoldaý kórsetiledi. Búgin jarysqa qatysýshylarmen Almaty ákimi Erbolat Dosaev kezdesip, qatysýshylarmen áńgimelesip, jumystarymen tanysty.
Erbolat Dosaev qala ákimdigi stýdent jastar arasynda jumysshy mamandyqtardyń damýyn qoldaitynyn jáne keibir mamandyq boiynsha grant bólý múmkindigin qarastyryp jatqanyn atap ótti. Qala ákimi tehnikalyq jáne kásiptik bilimniń bedelin arttyrýǵa baǵyttalǵan mundai is-sharalardyń mańyzdylyǵyn da erekshe aitty.
Saiys injeneriia jáne IT-den bastap qyzmet kórsetý, dizain, qurylys jáne avtokólikti diagnostikaǵa deiingi kóptegen quzyretti qamtidy. Jas mamandar tájiribelik daǵdysyn kórsetip otyr: santehnikalyq jabdyqtardy ornatady, kabeldik jelilerdi tartady, elektronika jobalaý jáne jinaý, mobildi qosymshalar men grafikalyq dizain jasaidy, 3D-printerde buiymdar shyǵarady.
Shyǵarmashylyq baǵytqa da erekshe kóńil bólindi: qatysýshylar kiim úlgilerin ázirlep, vitrinalardy bezendirip, aspazdyq taǵamdar daiyndap, kúrdeli shashtaraz tehnikasyn oryndaidy. Baiqaýǵa qatysýshylar telekommýnikatsiia jáne avtokólikterdi tehnikalyq qyzmet kórsetý salasynda da kásibi sheberligin kórsetýde.
Jarysqa qatysýshynyń biri Almaty qurylys-tehnikalyq kolledjiniń 17 jastaǵy stýdenti Dmitrii Klimov «Santehnika jáne jylytý» quzyretinde bilimi men daǵdysyn kórsetýde. Ol kolledjde alǵan bilimin kúndelikti ómirde de qoldanady.
«Bizge tapsyrma berildi, men radiator ornatyp, peshti qostym, rakovina, ýnitaz jáne káriz júiesin ornattym. Bulardyń bárin bizge kolledjde úiretedi. Santehnika baǵytyn sanaly túrde tańdadym, sebebi bul suranysqa ie ári bolashaǵy bar sala dep sanaimyn. Óz bilimimdi úide de qoldanamyn. Birde úide ýnitaz buzylyp qaldy, ony ózim jóndedim. Anam sheber shaqyrtýdyń qajeti bolmaǵanyna qýandy», - dedi Dmitrii Klimov.
Taǵy bir qatysýshy Bota Erdenbaer oqýyn telekommýnikatsiia salasyndaǵy naqty jumysymen ushtastyryp júr jáne bolashaqta provaiderlik kompaniia ashýdy armandaidy. Botaǵa bul salaǵa qyzyǵýshylyq jasóspirim shaǵynda-aq paida bolǵan, ol kezde internettiń qalai jumys isteitinine qyzyǵa bastaǵan.
«Salada mamandar tapshy, al bilikti kadrlarǵa suranys óte joǵary. Kóp adam osy mamandyqqa qyzyǵýshylyq tanytsa deimin. Men eńbek naryǵyndaǵy baǵamdy qazirdiń ózinde sezinip otyrmyn – bul áli bastamasy ǵana. Kolledjde oqyp júrip, bos ýaqytymda júie ákimshisi bolyp jumys istep, aqsha tabamyn. Bolashaqta IT-kompaniiamdy ashqym keledi», - dedi Bota Erdenbaer.
Baiqaý jumystaryn 500-den astam sarapshy men jumys berýshi baǵalaidy. Jeńimpazdar osy jyldyń 14 sáýirinde anyqtalady. Marapattaý rásimi sol kúni Oqýshylar saraiynda ótedi.
Sarapshynyń biri Tańsholpan Tólendieva tehnikalyq ǵylymdar magistri ári oqytýshy. Ol avtomehanika salasyndaǵy sanaýly áiel mamannyń biri. Almaty ákimdiginiń qoldaýymen Tólendieva Germaniiada taǵylymdamadan ótip, EuroSkills chempionatynyń sarapshysy atandy.
«Stýdentter tapsyrmalardy tolyq oryndaidy. Úsh jyl ishinde biz olarǵa mehanikanyń negizderimen qatar zamanaýi tehnologiiany da úiretemiz, osylaisha túlekter eńbek naryǵynda básekege qabiletti bolady. Mysaly, qatysýshylar porshen saqinalaryn aýystyryp, qozǵaltqyshty bólshektep-jinaýmen, berilis qorabymen jumys isteýmen ainalysady, sondai-aq, shyn avtokólikke diagnostika júrgizip, aqaýlardy joiady», – dedi kolledj oqytýshysy, EuroSkills halyqaralyq sarapshysy Tańsholpan Tólendieva.
Chempionat aiasynda kásibi baǵdar berý jumystary da belsendi júrgizilýde: 15 myńnan astam mektep oqýshysy is-sharaǵa qatysyp, jumysshy mamandyqtar boiynsha oqýǵa ótinish berdi.
Búginde Almatyda 88 kolledj jumys isteidi, onda 85 myńnan astam stýdent oqidy. 22 memlekettik kolledjde jumysshy mamandardy daiarlaý tolyǵymen qala ákimdigi esebinen qarjylandyrylady.
WorldSkills Almaty-2025 chempionatynyń júlde qory shamamen 10 million teńge. 30 negizgi quzyret boiynsha jeńimpazdarǵa aqshalai syilyq tabystalady: I orynǵa — 150 000 teńge, II orynǵa — 100 000 teńge, III orynǵa — 50 000 teńge.
Saltanatty marapattaý rásimi 14 sáýirde Oqýshylar saraiynda ótedi. Óńirlik kezeń jeńimpazdary WorldSkills Kazakhstan-2025 respýblikalyq chempionatynda Almatynyń atynan qatysady. Top jaryp, úzdik atanǵandar 2026 jyly Shanhaida ótetin halyqaralyq chempionatta Qazaqstannyń namysyn qorǵaidy.
