Atbasar qalasyndaǵy koloniiada sottalǵandarǵa jasalǵan azaptaý isi boiynsha shyǵarylǵan alqabilerdiń aqtaý úkimi joiyldy. Bul týraly 11 sáýir kúni Aqmola oblystyq soty habarlady, dep habarlaidy Dalanews.kz.
Sot úkimi nege joiyldy?
Sottyń málimetinshe, Atbasar aýdandyq qylmystyq-atqarý júiesi mekemesiniń 12 qyzmetkeri Qylmystyq kodekstiń 146-baby 3-bólimi 1-tarmaǵy boiynsha («azaptaý») aiyptalǵan. Alaida alqabiler olardy qylmys quramy joq dep taýyp, aqtap shyqqan bolatyn. Oblystyq sottyń qylmystyq ister jónindegi sot alqasy bul sheshimdi joidy. Sebebi birinshi instantsiia sotynyń jumysynda birqatar zańbuzýshylyqtar anyqtalǵan.
Birinshiden, sot alqabiler qatyspaýy tiis máselelerdi olardyń kózinshe qarastyrǵan. Ekinshiden, keibir jábirlenýshilerge sot jaryssózderine qatysý múmkindigi berilmegen.
Is qaita qaralady
Endi bul is sol sotta, biraq basqa qurammen qaita qaralatyn boldy.
Is qalai bastaldy?
Atbasar túrmesiniń qyzmetkerlerine qatysty qylmystyq is 2024 jyldyń shildesinde bastalǵan. Buǵan sebep — internette sottalǵandardy uryp-soqqan videolardyń taralýy edi. Is jabyq rejimde qaraldy. Jábirlenýshi dep tanylǵandar sany — 41 adam. Olardyń qatarynda qoǵam belsendisi Timýr Danebaev ta bar. Ol sotta azaptaý men qorlaý áreketteri týraly jan-jaqty málimet bergen. Onyń aitýynsha, jazasyn óteý barysynda keminde 20 ret qatygezdikke tap bolǵan.
Qyzmetten bosatylǵandar men prezidentke úndeý
Osy daýly oqiǵadan keiin QAJK-nyń 11 qyzmetkeri jumystan qýyldy. Olar prezidentke beineúndeý joldap, óz áreketterin zań aiasynda, iaǵni «sottalǵandardyń jappai baǵynbaýyn toqtatý» úshin jasaǵandaryn málimdegen.
