2025 jyldan bastap quny 20 000 ailyq eseptik kórsetkishten (AEK) asatyn kólikter mindetti túrde memleketke deklaratsiia arqyly kórsetilýi tiis. Jańa talap Qazaqstanda nemese shetelde satyp alynǵan qymbat kólikterge birdei qoldanylady, dep habarlaidy Dalanews.kz.
Kolesa.kz taratqan aqparatqa súiensek, atalǵan talap 15 shildede Memleket basshysy qol qoiǵan Salyq kodeksine engizilgen ózgerister negizinde kúshine engen.
“Endi Qazaqstan Respýblikasynyń azamattary men elimizde turaqty turatyn jeke tulǵalar eseptik salyq kezeńinde quny 20 000 AEK-ten (búgingi baǵammen shamamen 78 640 000 teńge nemese 148,6 myń AQSh dollary) asatyn múlik satyp alsa, sonyń ishinde memlekettik tirkeýge jatatyn mehanikalyq kólik quraldary men tirkemelerdi, mindetti túrde deklaratsiialaýy tiis”, — delingen habarlamada.
Bul norma 2025 jyly 1 qańtardan bastap kúshine enedi jáne keri kúshpen qoldanylady. Iaǵni, 2025 jyldyń basynan beri osyndai somaǵa kólik alǵan azamattar deklaratsiia tapsyrýǵa mindetti bolady.
“Deklaratsiiany tabystar men múlik týraly jyl saiyn turaqty tirkelgen nemese turyp jatqan mekenjaiy boiynsha tapsyrý qajet. Mysaly, 2025 jyly satyp alynǵan kólik úshin deklaratsiia 2026 jyldyń 15 qyrkúieginen keshiktirilmei tapsyrylýy tiis”, — dep tolyqtyrdy derekkóz.
Aita keteiik, qazirgi tańda Qazaqstanda jańa Salyq kodeksi ázirlenip jatyr. Onyń jobasynda eski kólikterge salyqtyq jeńildikter qarastyrylsa, quny 75 million teńgeden asatynqymbat kólikterge qosymsha aktsiz engizý usynylǵan. Alaida bul qujat áli talqylaný satysynda.
