Belarýsiianyń Vitebsk qalasynda ótken estradalyq ánderdiń «Slavian bazary» XXXIV halyqaralyq festivaliniń gran-pri iegeri atanǵan Dánesh Raqyshev atyndaǵy Jetisý oblystyq filarmoniianyń jeke daýystaǵy ánshisi Almagúl Battalievany búgin oblys ákiminiń orynbasary Dias Esdáýletov quttyqtap, Jetisý oblysynyń ákimi Beibit Isabaevtyń atynan Qurmet gramotasyn jáne aqshalai sertifikat tabys etti,- dep habarlaidy Dalanews.kz
Búgin tańerteń Jetisý oblysynyń delegatsiiasy «Slavian bazary» festivaliniń bas júldegerin Almatydaǵy áýejaidan qarsy alǵan bolatyn. Sol siiaqty Taldyqorǵannyń kireberisinde de jetisýlyq áriptesteri A. Battalievaǵa qurmet kórsetip, kútip aldy.
Oblys ákimdiginde jas ánshini qabyldaǵan Dias Esdáýletov qazaq ónerin nasihattaýǵa qosqan úlesi úshin oǵan alǵysyn bildirip, «Slavian bazary» festivali ótken jyldar ishinde qazaqstandyqtar birneshe márte gran-pri ielenip, júldegerler qatarynan kóringenin atap ótti. Ánshiniń eńbegine tabys tilep, jeńisimen quttyqtady.
– Osy armanyma qol jetkizý úshin segiz jyl eńbektendim. Meniń boiymda jaqsy qasiet kóp, sonyń ishinde maqsatqa jetýdegi tabandylyǵym meni osyndai biikke jetkizdi. Álige deiin jeńimpaz bolǵanyma sene almai turmyn. Maǵan qoldaý bildirgen oblys ákimdigine, mádeniet basqarmasynyń basshylyǵyna, Dánesh Raqyshev atyndaǵy ózimniń súiikti filarmoniiamnyń ujymyna alǵysymdy bildiremin. Ásirese, ustazym Merýert Músirálige kóp rahmet. Ol meni uzaq jyldar boiy osyndai mýzykalyq saiystarǵa daiyndap, baptady. Teledidar arqyly qoldaý kórsetken týǵan-týystaryma, jaqyndaryma, ásirese «Boztorǵai» qoǵamdyq qorynyń basshylyǵyna aitar alǵysym zor, – dedi týǵan eline qýanyshpen oralǵan «Slavian bazarynyń» jeńimpazy A. Battalieva.
Sondai-aq ol aldaǵy kúnderde magistratýraǵa grantqa túsýge talaptanyp kóretinin aitty.
Oblys ákimdiginde ótken saltanatty sharadan keiin «Slavian bazary – 2025» baiqaýynyń jeńimpazy men oblystyq mádeniet, arhivter jáne qujattama basqarmasynyń basshysy Qýanysh Súleimenovtiń qatysýymen baspasóz máslihaty ótti.
Jalpy Almagúl Battalievanyń Dánesh Raqyshev atyndaǵy Jetisý oblystyq filarmoniiasynda jeke daýystaǵy ánshi bolyp jumys istep júrgenine úsh jyl boldy. Ol buǵan deiin de birneshe respýblikalyq, halyqaralyq baiqaýlardyń laýreaty atanǵan.
Atap ótsek, ol 2015 jyly P.Chaikovskii atyndaǵy mýzyka kolledjinde, T.Júrgenov atyndaǵy Qazaq ulttyq óner akademiiasynda bilim alǵan. Sonymen qatar Almagúl birneshe aspapty – akkordeon, fortepiano jáne ýkýleleny erkin meńgergen.
