Shalqar aýdandyq sotynda sáýlet, qala qurylysy jáne qurylys bólimi basshysynyń ústinen qozǵalǵan qylmystyq is qaralyp jatyr. Ol merdigerlerden milliondaǵan teńge kóleminde para aldy dep aiyptalýda, dep habarlaidy Dalanews.kz Qazaqparatqa siltep.
Tergeý nusqasy boiynsha, 2021 jyly Shalqar aýdandyq sáýlet, qala qurylysy jáne qurylys bólimi men «Daneker» JShS arasynda Kópmola, Jylan jáne Kendala aýyldaryndaǵy sý qubyry jelilerin qaita jańǵyrtýǵa shart jasalǵan. Jobanyń jalpy uzyndyǵy – 1030 shaqyrym, bastapqy quny – shamamen 800 million teńge. Jumystardy aiaqtaý merzimi 2022 jylǵy jeltoqsan dep josparlanǵan.
Alaida 2022–2023 jyldary jobaǵa birqatar ózgeris engizilip, nátijesinde onyń quny eki esege jýyq ósip, 1,9 milliard teńgege jetken.
2024 jyly bólim basshysy qyzmetine Shýǵa S. taǵaiyndalǵan. Aiyptaýshy taraptyń málimetinshe, ol «Daneker» JShS direktory Iskakovpen tanysyp, qyzmettik ókilettigin paidalana otyryp, oryndalǵan jumystar aktilerin, sonyń ishinde naqty oryndalmaǵan jumystar boiynsha da, bekitip berý úshin odan 5 million teńge kóleminde para talap etken. Eger talap oryndalmasa, tekserister uiymdastyryp, merdigerdiń jumysyna baqylaýdy kúsheitetinin aitqan.
Bul áreket Qazaqstan Qylmystyq kodeksiniń 366-baby, 3-bóligi, 1-tarmaǵy boiynsha para talap etý retinde saralanyp otyr. Qorqyp qalǵan «Daneker» JShS direktory para berýge kelisip, qazan aiyndaǵy aktiler bekitilip, qarjy tólengennen keiin aqsha beretinin aitqan. Keiin kompaniia shotyna 228,2 million teńge túsip, sonyń artynan Iskakov eki jeke tulǵanyń shotyna 5,7 million teńge aýdarǵan.
"Zańsyz áreket ekenin tolyq túsinse de, qoryqqandyqtan aqsha aýdarýǵa májbúr boldy", - dedi memlekettik aiyptaýshy sotta.
Qylmystyq istiń ekinshi epizody «AziiaStroiProekt777» JShS-men bailanysty. Bul kompaniia 2023 jyly Shalqar aýdandyq sáýlet bólimimen Shalqar qalasyndaǵy úsh eki qabatty jaldamaly-kommýnaldyq turǵyn úige injenerlik infraqurylymdy qosý jóninde kelisimshart jasasqan. Bastapqyda kelisimshart quny 71,8 million teńge bolsa, 2024 jyly qosymsha kelisim arqyly soma 115,3 million teńgege deiin ósken.
Tergeý málimetinshe, sheneýnik bul kompaniia basshysynan da oryndalǵan jumystar aktilerin kedergisiz bekitý úshin 8 million teńgeden astam para talap etken. Kompaniia direktory Muńbaev bul somany birneshe adamnyń esepshotyna aýdarǵan.
Sot tyńdaýynda sol adamdardyń keibiri kýáger retinde jaýap berip jatyr. Sondai-aq qorǵaýshy tarap Shalqar aýdanynyń ákimi Janbolat Jidehandy sotqa kýá retinde shaqyrýdy surady.
