Qyzylorda oblysy Shieli aýdandyq aýrýhanasynyń ákimshiligi kelýshilerden dúniege sábi ákelgen anany perzenthanadan dýmandatpai shyǵaryp alýǵa shaqyrdy. Bul týraly meditsinalyq uiym Facebook áleýmettik jelisindegi paraqshasynda jazdy,- dep habarlaidy Dalanews.kz
"Kún saiyn saǵat 12:00-den bastap jumys ýaqytynyń sońyna deiin aýdandyq aýrýhana aldy toidaǵydai ý-shýǵa, qaptaǵan kólikterge, shoýǵa, animatorlarǵa tolady. Ata-analar, týma-týys, dos-jaran kishigirim toi jasaidy. Birneshe ret eskertý jasaldy... Eskertýge qaramastan, dýmandy toi kúnde jalǵasýda. Turǵyndar jańa bosanǵan anaǵa, ómirge kelgenine jeti kún tolmaǵan balasyna erekshe kútim men tynyshtyq kerek ekenin bile tura, ánshilerdi, animatorlardy jaldap, kontsert uiymdastyrýdy úirenshikti ádetke ainaldyrǵan", - delingen jazbada.
Aýdandyq aýrýhana kópbeiindi bolǵandyqtan, basqa bólimshelerde aýyr jaǵdaidaǵy naýqastar jatady.
"Jansaqtaý bóliminde ómir úshin kúresip jatqan aýyr jaǵdaidaǵy naýqastar jáne olardyń janyn shúberekke túiip, tileýin tilep otyrǵan týystarynyń jaǵdaiyna adami turǵydan túsinistikpen qaraǵan jón. Perzenthana reanimatsiiasynda da óz ómiri úshin kúresip jatqan náresteler bar ekenin umytyp ketedi. Náresteni ómirge ákelgen analardyń da aýrýhananyń reanimatsiiasynda jatatyn jaǵdailary bolady. Analardyń biri sábiin qushaǵyna alsa, keibir ananyń sábii jansaqtaý bóliminde ómir úshin kúresip jatady. Náreste týǵannan keiingi alǵashqy kúnderde, anasy siiaqty tynyshtyq pen demalýdy qajet etedi. Bosanǵan ana sharshaidy jáne ol ádette balasymen tynyshtyqta bolǵysy keledi. Bul oraida qaýmalap kelgen týǵan-týystyń ý-shýy jáne qatty mýzyka jańa týǵan náresteniń estý qabiletine zaqym keltirýi múmkin ekenin, tipti nárestede nevrologiialyq máselelerdi týdyrýy múmkin ekenin bilý mańyzdy.
Sondyqtan aýdandyq aýrýhana ainalasynda, perzenthana mańynda balany shyǵaryp alýǵa kelgende shoý-baǵdarlama jasap, túrli animatorlardy jaldamaýǵa ákimshilik tarapynan talap etemiz", - dedi aýrýhana ákimshiliginde.
