قىزىلوردا وبلىسى شيەلى اۋداندىق اۋرۋحاناسىنىڭ اكىمشىلىگى كەلۋشىلەردەن دۇنيەگە ءسابي اكەلگەن انانى پەرزەنتحانادان دۋمانداتپاي شىعارىپ الۋعا شاقىردى. بۇل تۋرالى مەديسينالىق ۇيىم Facebook الەۋمەتتىك جەلىسىندەگى پاراقشاسىندا جازدى،- دەپ حابارلايدى Dalanews.kz
"كۇن سايىن ساعات 12:00-دەن باستاپ جۇمىس ۋاقىتىنىڭ سوڭىنا دەيىن اۋداندىق اۋرۋحانا الدى تويداعىداي ۋ-شۋعا، قاپتاعان كولىكتەرگە، شوۋعا، انيماتورلارعا تولادى. اتا-انالار، تۋما-تۋىس، دوس-جاران كىشىگىرىم توي جاسايدى. بىرنەشە رەت ەسكەرتۋ جاسالدى... ەسكەرتۋگە قاراماستان، دۋماندى توي كۇندە جالعاسۋدا. تۇرعىندار جاڭا بوسانعان اناعا، ومىرگە كەلگەنىنە جەتى كۇن تولماعان بالاسىنا ەرەكشە كۇتىم مەن تىنىشتىق كەرەك ەكەنىن بىلە تۇرا، انشىلەردى، انيماتورلاردى جالداپ، كونسەرت ۇيىمداستىرۋدى ۇيرەنشىكتى ادەتكە اينالدىرعان"، - دەلىنگەن جازبادا.
اۋداندىق اۋرۋحانا كوپبەيىندى بولعاندىقتان، باسقا بولىمشەلەردە اۋىر جاعدايداعى ناۋقاستار جاتادى.
"جانساقتاۋ بولىمىندە ءومىر ءۇشىن كۇرەسىپ جاتقان اۋىر جاعدايداعى ناۋقاستار جانە ولاردىڭ جانىن شۇبەرەككە ءتۇيىپ، تىلەۋىن تىلەپ وتىرعان تۋىستارىنىڭ جاعدايىنا ادامي تۇرعىدان تۇسىنىستىكپەن قاراعان ءجون. پەرزەنتحانا رەانيماسياسىندا دا ءوز ءومىرى ءۇشىن كۇرەسىپ جاتقان نارەستەلەر بار ەكەنىن ۇمىتىپ كەتەدى. نارەستەنى ومىرگە اكەلگەن انالاردىڭ دا اۋرۋحانانىڭ رەانيماسياسىندا جاتاتىن جاعدايلارى بولادى. انالاردىڭ ءبىرى ءسابيىن قۇشاعىنا السا، كەيبىر انانىڭ ءسابيى جانساقتاۋ بولىمىندە ءومىر ءۇشىن كۇرەسىپ جاتادى. نارەستە تۋعاننان كەيىنگى العاشقى كۇندەردە، اناسى سياقتى تىنىشتىق پەن دەمالۋدى قاجەت ەتەدى. بوسانعان انا شارشايدى جانە ول ادەتتە بالاسىمەن تىنىشتىقتا بولعىسى كەلەدى. بۇل ورايدا قاۋمالاپ كەلگەن تۋعان-تۋىستىڭ ۋ-شۋى جانە قاتتى مۋزىكا جاڭا تۋعان نارەستەنىڭ ەستۋ قابىلەتىنە زاقىم كەلتىرۋى مۇمكىن ەكەنىن، ءتىپتى نارەستەدە نيەۆرولوگيالىق ماسەلەلەردى تۋدىرۋى مۇمكىن ەكەنىن ءبىلۋ ماڭىزدى.
سوندىقتان اۋداندىق اۋرۋحانا اينالاسىندا، پەرزەنتحانا ماڭىندا بالانى شىعارىپ الۋعا كەلگەندە شوۋ-باعدارلاما جاساپ، ءتۇرلى انيماتورلاردى جالداماۋعا اكىمشىلىك تاراپىنان تالاپ ەتەمىز"، - دەدى اۋرۋحانا اكىمشىلىگىندە.
