Resei saiahatshylary Qazaqstan politseilerin "aqsha bopsalady" dep aiyptap, jelide úlken másele kótergen. QR Ishki ister ministrligi týristerdiń áleýmettik jelidegi aiyptaýlaryn birden nazarǵa aldy. Kóptiń qyzý talqysyna túsken bul video búginderi sheteldik blogerlerdiń paraqshasynan joiylǵan, dep habarlaidy Dalanews.kz.
Reseilik blogerler Lera men Vova búkil álemdi saiahattap, qyzyqty kontent taratady. Birneshe kún buryn olar Instagram-daǵy óz paraqshasynda Lera Qazaqstanda tas jol ústinde politseiler ózderiniń qaltasyn qaǵa jazdaǵanyn aityp, video jariialady. Onyń aitýynsha, aldymen olardyń dostarynyń kóligin toqtatqan. Sóitip olardy "tútikke úrleýge" májbúr etken, júrgizýshi alkogol tutynbasa da qurylǵyda 0,17 promill degen tsifr atyp shyqqan.
"Birden júrgizýshi kýáliginen aiyrmaq boldy. Sodan keiin, árine, másele aqshaǵa da kelip jetti: 1,5 mln teńge...", - dedi Lera.
Sodan keiin sol tártip saqshylary blogerlerdi toqtatqan. Blogerdiń kúieýinen qujattaryn alyp alǵan. Biraq, Lera aitqandai, olar kamerany alyp, bolyp jatqan oqiǵany túsire bastaidy, aqyrynda týristerdi óz jónine jibergen.
"Qazaqstan shynymen de tamasha memleket, biraq shet elde ózindi aqsha toly sómke sekildi seziný jaǵymsyz eken", – deidi bloger. Aitqandai, qazir bul jazba olardyń paraqshasynan joiylǵan.
Búgin, QR IIM bul jaǵdaiǵa qatysty túsinikteme berdi.
"Atalǵan video paida bola salysymen IIM ókilderi jazba avtoryna habarlasty. Týrist vedomstvo tarapynan ashyqtyq, qonaqjailylyq jáne jedel árekettiń bolýyna bailanysty alǵys bildirdi. Politsiia qyzmetkerleriniń is-áreketteri Almaty oblysy Eńbekshiqazaq aýdanynyń aýmaǵynda josparly is-sharalar sheńberinde jol qaýipsizdigin qamtamasyz etýmen bailanysty boldy", - dep habarlady vedomstvodan.
Ministrlik óz qyzmetkerleriniń kez-kelgen zańsyz áreketteri qatań jáne birden aýyzdaqtylatynyn naqtylady. Degenmen ministrlik blogerlerdiń 1,5 mln teńge bopsalaý týraly málimdemesine qatysty eshteńe aitpaǵan.
